Azərbaycan, Bakı, 21 iyul/ Trend , müxbir İ.Xəlilova/ İslam İnkişaf Bankı (İİB) üç kiçik şəhərdə su təchizatı sisteminin bərpası layihəsinin ətraflı qiymətləndirilməsi üçün avqustun 3-də Azərbaycana missiya göndərməyi planlaşdırır. Bu barədə bazar ertəsi ölkənin Nazirlər Kabinetindən məlumat veriblər. Qiymətləndirmə missiyasının səfəri dəfələrlə təxirə salınıb və sonuncu tarix iyunun 20-nə təyin edilib.
İlkin qiymətləndirmələrə əsasən, İslam bankından $47-48 mln. cəlb etmək planlaşdırılır. İİB-in maksimal kredit məbləğinin 7 mln. islam dinarı ($10,5 mln.) olmasını nəzərə almaqla, su layihəsinə kommersiya maliyyələşdirməsi təqdim edilə bilər. Hökumət bu layiə üçün güzəştli kredit istəyib ki, bu da maliyyələşdirmə tranşlarla verildiyi halda mümkündür.
İİB-in layihəsinə Ağcabədi, Balakən və Beyləqan daxil edilib. Su layihəsi ilkin olaraq altı rayonu əhatə etsə də, "Azərsu" qiymətləndirmə sənədini vaxtında hazırlaya bilmədiyi üçün, üç rayon istisna edilib (Daşkəsən, Gədəbəy və Dəvəçi). Onlar digər beynəlxalq təşkilatların maliyyələşdirdikləri su layihələrinə daxil edilə bilər.
Su layihəsi 2008 -2010 - cu illərdə İİB-lə yeni əməkdaşlıq proqramında nəzərdə tutulub və növbəti ilin aprelində başa çatan 2008 - ci maliyyə ilində maliyyələşdirməyə daxil edilib.
Azərbaycanın 61 rayon və şəhərində kommunal layihələrin maliyyələşdirilməsinə 1,4 mlrd. manat tələb olunur. Ölkənin 13 rayonunda su təchizatı və kanalizasiya sisteminin yenidən qurulması üçün Asiya İnkişaf Bankı, İİB və Yaponiya Beynəlxalq Əməkdaşlıq Bankı ilə danışıqlar aparılır.
İİB-in bu ilki Proqramına, su layihəsindən əlavə, Bəhramtəpə avtomobil yolunun yenidən qurulması, Mil - Qarabağ kollektorunun yenidən qurulması layihəsi üçün texniki-iqtisadi əsaslandırmanın hazırlanmasına qrantların alınması və borcların idarə edilməsi üzrə Nazirlər Kabinetinin potensialının gücləndirilməsi daxildir. Bu gün sonuncu layihə üzrə maliyyələşdirmə barədə qərar qəbul edilib.
Üçillik Proqram ümumilikdə ilkin dəyəri $220 mln. olan 10 layihəni özündə birləşdirir.
İyulun 21-nə olan cari məzənnə - 0,8056 AZN/USD.
Müəlliflə əlaqə saxlamaq üçün elektron ünvan: [email protected]
