Azərbaycan, Bakı, 29 iyul/ Trend / İkinci dairəvi yol Bakı buxtası rayonunda (Bayıl və Zığ qəsəbələri rayonunda) tikilməsi planlaşdırılan körpüyə birləşdirilə bilər. Bu barədə "Əmlak bazarı" jurnalına müsahibəsində Bakının nəqliyyat infrastrukturunun inkişafı üzrə layihələrin idarə edilməsi qrupunun rəhbəri Ömər Qoçulu məlumat verib. Hazırlanmaqda olan ikinci dairəvi yolun (Bakı dairəvi - 2 layihəsi) layihəsi bir müddət əvvəl ekspertizaya verilib.
Bu layihə nəzərdə tutur ki, yeni yol sahil boyu Lökbatan, Xocahəsən, Biləcəri, Novxanı, Məhəmmədi, Pirşağı, Maştağa, Hövsandan keçəcək.
Yeni yolun uzunluğu 58- 60 km təşkil edir. İkitərəfli yol dörd xətdən ibarət olacaq. Dairəvi yolda onlarla körpü və yol ayırıcılarının tikintisi planlaşdırılır.
İlkin hesablamalara əsasən, Bakı buxtası rayonunda körpünün tikintisi layihəsinin dəyəri $1,2-1,3 mlrd. təşkil edir. Bu layihənin reallaşdırılması üzrə işlərin həyata keçirilməsi üçün Koreya hökuməti qrant ayırıb. Koreya şirkəti layihənin texniki-iqtisadi əsaslandırılmasını və ilkin dizaynını təqdim etməlidir.
Körpünün dəniz hissəsinin uzunluğu 14 km təşkil edəcək. Beş il ərzində bu körpünün tikintisini başa çatdırmaq planlaşdırılır. Bu layihədə Azərbaycanın sərmayələri olmayacaq və onun reallaşdırılması, istismarı üzrə bütün işləri istehsalçı şirkət həyata keçirəcək.
