Azərbaycan, Bakı, 13 avqust/ Trend , müxbir İ.Xəlilova/ Asiya İnkişaf Bankı (AİB) sentyabrın ikinci həftəsində Azərbaycanın üç kommersiya bankı ilə kredit razılaşmasını imzalamağa hazırlaşır, - çərşənbə günü Bankın Bakı nümayəndəliyindən bildiriblər. Banklara verilən kreditin ümumi məbləği $30 mln. təşkil edir.
"Hazırda hər bank üçün kreditin məbləği ayrı-ayrılıqda konkretləşdirilir", - nümayəndəlikdən qeyd ediblər.
Kredit alıcıları Bank Standard, Texnika Bank və UniBank-dır. Kredit vəsaitləri ölkədə kiçik və orta biznesin inkişafına hesablanıb. Əvvəlcədən Asiya Bankı yalnız Bank Standard ilə $50 mln.məbləğində avtomobil kreditləşməsi üzrə təhlükəsizlik layihəsinin həyata keçirilməsini planlaşdırıb. Texnika Bank üçün avrobondların (bridge financing) buraxılışının təşkilinə $50 mln. məbləğində paket hazırlanıb.
AİB Azərbaycanın bank sektorunda maliyyələşdirmənin həcmini əvvəl nəzərdə tutulmuş $120 milyondan $150-200 milyonadək artırmağa hazırdır. İlin sonunadək portfel $100 milyonadək çatdırılacaq.
Bu günədək AİB Azərbaycan bankları üçün $56 milyonu təsdiq edib. Asiya Bankı Azərbaycanın bank sektorunun birbaşa maliyyələşməsi üzrə əsas oyunçuya çevrilməyə başlayıb. AİB kiçik və orta sahibkarlığa, ticarətin maliyyələşdirilməsinə yardım Proqramları çərçivəsində, Bank Respublika, Bank of Baku, Azərbaycan Mikromaliyyələşdirmə Bankı, AGBank kimi bankları maliyyələşdirib. Subordinasiya kreditləri ABB və Bank Respublika üçün açılıb.
Avqustun 13-nə valyutanın rəsmi məzənnəsi 0,8131 AZN/USD-dır.
