Azərbaycan, Bakı, 03 sentyabr/ Trend Cap , müxbir S.Babayeva/ İqtisadi Əməkdaşlıq Təşkilatına (ECO) üzv ölkələrin kənd təsərrüfatı nazirləri Bakıda toplaşacaq. Azərbaycanın Kənd Təsərrüfatı Nazirliyindən çərşənbə günü verilən məlumata görə, sentyabrın 8 -10 - da keçiriləcək görüşdə ECO - nun Baş katibi Xurşid Ənvərin başçılıq etdiyi təşkilata üzv ölkələrin nümayəndə heyətləri ilə yanaşı, BMT-nin Kənd Təsərrüfatı və Ərzaq Təşkilatı (FAO), Beynəlxalq Seleksionerlərin Hüquqlarının Müdafiəsi Təşkilatı (UPOV), Beynəlxalq Kənd Təsərrüfatı Tədqiqatları Mərkəzinin (İCARDA), Beynəlxalq Epizootik Büronun yüksək vəzifəli nümayəndə heyətlərinin iştirakı gözlənilir.
"Bu, ECO -ya üzv ölkələrin kənd təsərrüfatı nazirlərinin dördüncü görüşüdür. Əvvəlki görüş Tehranda keçirilib", - nazirlikdən bildiriblər.
İclasın gündəliyinə ECO-nun ərzaq təhlükəsizliyi, donor təşkilatları məsələləri üzrə regional proqramının, həmçinin, ECO ölkələrinin bitki toxumları ilə təminatının gücləndirilməsi, biotexnologiyaların inkişafı, təşkilatın baytarlıq komissiyalarının fəaliyyəti, əməkdaşlıq və təcrübə mübadiləsinin müzakirəsi daxildir.
İclas başa çatdıqdan sonra, Bakı bəyannaməsi qəbul ediləcək və ECO kənd təsərrüfatı nazirlərinin növbəti görüşünün yeri və vaxtı müəyyən ediləcək.
İqtisadi Əməkdaşlıq Təşkilatı 1995 - ci ildə Mərkəzi Asiya və Yaxın Şərq ölkələri tərəfindən yaradılan dövlətlərarası regional təşkilatdır. ECO Katibliyinin mənzil-qərargahı Tehranda yerləşir.
ECO - nun tərkibinə Azərbaycan, Əfqanıstan, İran, Qazaxıstan, Qırğızıstan, Pakistan, Tacikistan, Türkiyə, Türkmənistan və Özbəkistan daxildir.
