Azərbaycan, Bakı, 09 sentyabr / Trend , Ü.İsmayılova/ Azərbaycan Maliyyə Nazirliyi "Sığorta fəaliyyəti haqqında" Qanuna əsaslanaraq fiziki şəxslərə məxsus olan avtonəqliyyat vasitələrinin vahid sığorta qaydalarının hazırlanması üzrə işlərə başlayıb. Bu barədə çərşənbə axşamı Azərbaycan Maliyyə Nazirliyinin dövlət sığorta nəzarəti şöbəsinin müdiri Namiq Xəlilov bildirib.
"Vahid qaydalar beynəlxalq avtosığorta təcrübəsinə əsaslanacaq və sığortaçı fiziki şəxslərin hüquq və maraqlarının daha etibarlı müdafiəsinin təmin edilməsinə yönəldiləcək", - deyə Xəlilov bildirib.
Onun sözlərinə görə, vahid qaydaların olması əhalinin sığorta savadının artırılması üzrə tədbirlərin daha səmərəli şəkildə həyata keçirilməsinə imkan yaradacaq, ölkənin sığorta bazarına etibar səviyyəsini artıracaq və avtosığortanın gələcək inkişafına təkan verəcək.
Vahid qaydaların tətbiqi avtosığorta bazarında rəqabətli mühitin inkişafına mane olmayacaq.
"Hətta vahid qaydaların mövcud olduğu təqdirdə belə, sığorta şirkətləri bir-birindən fərqlənən müxtəlif sığorta məhsulları hazırlamaq, xidmət keyfiyyəti, sığorta ödəmələrinin həyata keçirilmə surəti, əlavə xidmətlərin göstərilməsi və s. kimi istiqamətlər üzrə rəqabət üstünlüyünü inkişaf etdirmək imkanı əldə edəcək", - deyə Xəlilov bildirib.
Azərbaycan Maliyyə Nazirliyinin məlumatına görə, yanvar-iyun aylarının yekunu üzrə avtobilin könüllü sığortası üzrə haqlar 84,9 mln. manat, sığorta ödəmələri 16,7 mln. manat; avtonəqliyyat sahibinin məsuliyyətinin icbari sığortası üzrə haqlar 1,9 mln. manat, sığorta ödəmələri isə 343,5 min manat təşkil edib.
Məqalə müəllifi ilə əlaqə ünvanı - [email protected]