Azərbaycan, Bakı, 02 oktyabr/ Trend , müxbir N.İsmayılova/ 2008-ci ilin yanvar-iyunu ərzində Azərbaycan iqtisadiyyatında istifadə edilmiş xarici kapitalın ümumi həcmi $4 mlrd. təşkil edib ki, bu da 2007 - ci ilin analoji dövrünün göstəricisini 12,9 faiz qabaqlayır, Azərbaycan Milli Bankından ödəmə balansına istinadən məlumat veriblər. Sərmayə həcmlərinin xeyli artması qeyri-neft sektoruna dövlətin zəmanət vermədiyi xarici kreditlərin və sərmayələrin cəlb edilməsi ilə bağlıdır.
Hesabat dövrü ərzində istifadə edilmiş xarici kapitalın strukturunda ciddi kəmiyyət və keyfiyyət dəyişiklikləri baş verib. 2008-ci ilin birinci yarısı ərzində ötən illərdə ölkə iqtisadiyyatında istifadə edilmiş birbaşa sərmayələrin repatriasiyasının ümumi həcmi və xarici iqtisadiyyata birbaşa sərmayələr 31,2 faiz - $3 mlrd.-dək azalıb. Bu azalma "Əsrin Müqaviləsi" çərçivəsinfə neft - qaz sektorunda xarici öhdəliklərin azalması hesabına iri neft şirkətləri tərəfindən birbaşa sərmayələrin repatriasiya həcminin kiçilməsi ilə şərtlənib. 2007-ci ildə neft-qaz sektoru üzrə repatriasiya edilmiş sərmayələrin həcmi $4 mlrd. təşkil edib. 2008 - ci ilin yanvar - iyununda bu göstərici 2,3 dəfə azalaraq $2,8 mlrd.-a çatıb.
Ölkə iqtisadiyyatına birbaşa sərmayələrin ümumi həcmi $2,1 mlrd. təşkil edib. Neft - qaz sektorunun xüsusi çəkisi 10 faiz azalaraq, 80 faizə bərabər olub. Bu sərmayələr BP Exploration (Şahdəniz) Ltd-nin neft - qaz layihələri çərçivəsində, Cənubi Qafqaz boru kəməri şirkəti (Bakı - Tbilisi - Ərzurum qaz kəməri) tərəfindən Azərbaycan ərazisində tikinti işləri ilə əlaqədar və ABƏŞ tərəfindən "Azəri - Çıraq - Günəşli" yatağında istifadə edilib.
İqtisadiyyatın qeyri - neft sektoruna xarici kapital formasında $413,1 mln. həcmində sərmayə yatırılıb. Xarici sərmayələrin ümumi həcmində onların xüsusi çəkisi 20,3 faiz olub.
Müəlliflə əlaqə saxlamaq üçün elektron ünvan: [email protected]