Azərbaycan, Bakı, 21 noyabr/ Trend , müxbir E.İsmayılov/ Mərkəzi Asiya Regional İqtisadi Əməkdaşlıq (CAREC) Proqramının hesabatına əsasən, Azərbaycanın Dövlət Xəzər Dəniz Gəmiçiliyi (XDG) 2010 - 2013 - cü illərdə ümumi dəyəri 69 mln. dollar olan beş böyük tutumlu bərə və iki kransız yüklənən gəmi almağı planlaşdırır, - CAREC- in rəsmi hesabatında bildirilir.
Yeni gəmilərin alınması XDG - yə tələbata cavab vermək və Xəzər dənizində ticarətdə öz bazar payını artırmağa imkan verəcək. Bu layihənin realizəsi XDG tərəfindən maliyyələşdiriləcək, həmçinin, xarici maliyyələşdirmə də mümkündür, - hesabatda bildirilir.
Bir bərənin qiyməti 9 mln. dollar, kransız yüklənən bir gəminin dəyəri 12 mln. dollardır. Yeni bərələrin tutumu - 56 vaqon.
Hesabatda bildirilir ki, yaxın gələcəkdə XDG - nin özəlləşdirilməsi nəzərdə tutulur.
Xəzər Dəniz Gəmiçiliyi - iri gəmiçilik şirkətidir. Onun əsas fəaliyyəti, neft və neft məhsulları üstünlük təşkil etməklə, yüklərin daşınmasıdır. Gəmilərin üzdüyü rayonlar - Xəzər, Qara, Aralıq, Mərmərə dənizləridir. Xəzər gəmiçiliyinin Qara dəniz - Azov hövzəsində işləyən gəmiləri Avropa, Yaxın Şərq və Şimali Afrikanın əcnəbi kirayəçilərinin yüklərinin daşınmasını həyata keçirir.
Mərkəzi Asiya İqtisadi Əməkdaşlığı Proqramı AİB - in təşəbbüsü ilə 1998 - ci ildə təsis edilib.CAREC - səkkiz iştirakçı dövlətin (Əfqanıstan, Azərbaycan, ÇXR, Qazaxıstan, Qırğızıstan, Monqolustan, Tacikistan və Özbəkistan) və altı beynəlxalq təşkilatın (AIB, AYİB, BVF, İİB, BMT İnkişaf Proqramı və Dünya Bankı) tərəfdaşlığıdır.
Proqram infrastruktur layihələrinin maliyyələşdirilməsi və nəqliyyat, ticarətə yardım, ticarət siyasəti və energetika kimi prioritet sahələrdə regional siyasətin təkmilləşdirilməsinə yönəlib.
Müəlliflə əlaqə saxlamaq üçün elektron ünvan: [email protected]
