Azərbaycan, Bakı, 26 noyabr/ Trend , müxbir N.İsmayılova/ Bakı Banklararası Valyuta Birjasında (BBVB) fəaliyyət göstərən Birja Elektron Ticarət Sisteminin (BEST) informasiya terminalına ilk regional bank - Naxçıvanbank ASC qoşulub, - Birjada çərşənbə günü bildiriblər.
2008 - ci il mayın 1-dən - istifadəçilərin yeni ticarət - hesablama sisteminə miqrasiyasının başa çatmasından sonra, 42 ticarət və 17 informasiya terminalı vasitəsilə BEST-ə 47 istifadəçi qoşulub.
Bankların əksəriyyətində quraşdırılmış BBVB-nin müasir proqram təminatı Birjanın ilk dəfə 2002 - ci ilin martında tətbiq etdiyi BEST-in yeni versiyasıdır. Zaqafqaziya regionunda birinci birja elektron sistemi olan BEST Azərbaycanın valyuta və pul bazarlarının ayrılmaz hissəsi olub.
Birja xidmətlərinin göstərilməsində universallıq prinsipi əsasında qurulmuş sistem bankların likvidlik və risklərinin kompleks idarəsi üçün imkanları olan müasir ticarət meydanıdır.
BEST-in yeni proqram təminatı və texniki təminatı informasiya texnologiyalarının təhlükəsizliyinin təmin edilməsi məsələlərini yeni texnoloji səviyyəyə köçürür. Xüsusilə də, BEST istifadəçiləri elektron-rəqəmli imzalardan istifadə etmək imkanı qazanacaqlar.
Müəlliflə əlaqə saxlamaq üçün elektron ünvan - [email protected]
