Azərbaycan, Bakı, 28 noyabr/ Trend , müxbir E.İsmayılov, N.İsmayılova/ Dünya Bankı bu gün dünya maliyyə böhranı ilə əlaqədar Azərbaycana yardım göstərməyə zərurət görmür.
"DB və BVF-in böhranla əlaqədar Azərbaycana köməyi barədə danışmaq tezdir, hələ ki, bunun üçün bir səbəb yoxdur, - DB-nin Bakı nümayəndəliyinin rəhbəri Qreqori Yeceyçak hesab edir.
Onun sözlərinə görə, bankın tədqiqatları göstərir ki, Azərbaycan keçid iqtisadiyyatlı dövlətlərlə müqayisədə dünya maliyyə böhranının öhdəsindən gəlməyə daha yaxşı hazırdır.
Yeceyçak Azərbaycanın böhranla əlaqədar xeyli problemlərlə üzləşməməsinə imkan verən üç əsas amil göstərib: Azərbaycan banklarının kiçik həcmdə xarici borcları; Milli Bankın ölkənin özəl banklarının xarici valyuta risklərinə meylliliyinin azaldılmasına yönəlmiş ehtiyatlı siyasəti; xarici borcun ödənilməsi üçün Milli Bank və Dövlət Neft Fondunun xarici ehtiyatlarının kifayət səviyyədə olması.