Azərbaycan, Bakı, 02 dekabr/ Trend , müxbir A.Bədəlova/ Çərşənbə axşamı avronun dəyəri əvvəlki günün sonunda Nyu-Yorkda ticarət gününün sonuna olan 1,2611 dollara qarşı 1,2631 dollaradək artıb. Amerika valyutasının zəifləməsinin əsas səbəbi ABŞ - da resessiyanın dərinləşməsi olub. Bazar ertəsi Avropa Mərkəzi Bankının (AMB) faiz dərəcəsini azaltmasının gözlənilməsi şəraitində, Avropa valyutası dollara nisbətən ucuzlaşıb.Ekspertlər AMB - nin dekabrın 4 - də keçiriləcək iclasda faiz dərəcəsini 0,75 faiz bəndi azaldacağını proqnozlaşdırırlar. Bu həftə İngiltərə Bankının, Avstraliya Ehtiyat Bankının, Yeni Zelandiya Ehtiyat Bankının iclaslarının və Yaponiya Bankının təcili müşavirəsinin keçiriləcəyi gözlənilir. Hazırda AMB - nin dərəcəsi 3,75 faiz təşkil edir. Britaniyanın iqtisadi tədqiqatlar üzrə Konsaltinq Şirkəti Capital Economics-in avropalı iqtisadçısı Ben Meyin (Ben May) rəyinə görə, istehlak qiymətləri indeksinin istənilən müvəqqəti artımı AMB - nin faiz dərəcəsini azaltmasının qarşısını ala bilər. Şirkətin analitiklərinin rəyinə görə, 2009 - cu ildə faiz dərəcəsi 1,5 faizə düşəcək və uzun müddət bu səviyyədə qalacaq.
Analitiklər gələn il dolların məzənnəsinin artımını proqnozlaşdırırlar. Buna, Qərb sərmayədarlarını vəsaitləri problemli inkişafda olan bazarlardan çıxarmağa və onları geriyə -- ABŞ - a qaytarmağa məcbur edən maliyyə böhranı səbəb olacaq. Britaniyalı analitiklər 2009 - cu ildə avronun dollara nisbətdə məzənnəsinin 0,4 faiz - 2008 - ci ildəki 1,25 dollara qarşı 1,2 dollaradək zəifləyəcəyini proqnozlaşdırırlar. Cari ilin dördüncü rübündə avro şirkətin əvvəllər proqnozlaşdırdığı 1,35 dollara qarşı 1,25 dollaradək düşəcək.
Analitiklər Amerika valyutasının artmasının əsas səbəbi kimi, dünya iqtisadiyyatının resessiya vəziyyətinə daxil olması, dolların statusunun "təhlükəsiz sığınacaq" qismində saxlanılması və əmtəə qiymətlərinin düşməsini göstərirlər.
"Bu, qismən neftin aşağı qiymətlərinin ABŞ - da xarici ticarət kəsini azaldacağı ilə bağlıdır", - Capital Economics-in baş beynəlxalq iqtisadçısı Culian Cessop (Julian Jessop) hesab edir.
Britaniya analitiklərinin rəyinə görə, 2010 - cu ildə dolların məzənnəsi möhkəmlənmə tendensiyasını saxlayacaq.
Müəlliflə əlaqə saxlamaq üçün elektron ünvan: [email protected]