Azərbaycan, Bakı, 10 dekabr/ Trend , müxbir İ.Xəlilova/ "Beynəlxalq Valyuta Fondu (BVF) dünya maliyyə böhranının Azərbaycan iqtisadiyyatına təsiri ilə bağlı vəziyyəti öyrənir", - BVF- nin Bakı nümayəndəliyinin rəhbəri Koba Qvenetadze çərşənbə günü Azərbaycan Banklar Assosiasiyasının ümumi toplantısında bildirib.
"Azərbaycan böhrana yaxşı hazırlaşıb. Azərbaycanın bank sektoru dünya iqtisadiyyatına az inteqrasiya etdiyi üçün, dünya prosesləri sistemə təsir göstərməyib", - Qvenetadze vurğulayıb.
Onun sözlərinə görə, Azərbaycan hökuməti yüksək neft hasilatı dövründə xeyli ehtiyat yaradıb ki, bu da hazırda böhranın ölkə iqtisadiyyatına təsirini aradan qaldırmağa imkan verir. Respublikanın cəlb etdiyi xarici borclanmalar valyuta ehtiyatlarından aşağıdır. Belə ki, Azərbaycanın xarici borclanmaları səkkiz milyard dollar təşkil etdiyi halda, strateji valyuta ehtiyatları 18 mlrd. dollara bərabərdir.
"Böhran davam etsə də, hesab edirəm ki, ölkələr maliyyə sektoruna dəstək göstərməlidirlər. Mərkəzi banklar bank sektorunda likvidlik probleminin həllinə təkrarmaliyyələşdirmə ilə bağlı dəstək verməli, bankların kredit portfellərinin strukturuna diqqət yetirməlidirlər", - o bildirib.
BVF yeni likvidliyə dəstək qısamüddətli mexanizmini yaradıb. Mexanizmə əsasən, Fond üç ay müddətinə kvotanın 500 faizinədək məbləğdə vəsaitlər təqdim edir. Belə dəstək alan ölkələr arasında Ukrayna (16,4 mlrd. dollar - ölkənin kvotasının 802 faizini təşkil edir), Macarıstan 15,7 mlrd. dollar (kvotanın 1015 faizi) var. Hazırda Latviya hökuməti ilə danışıqlar aparılır.