Azərbaycanda kənd təsərrüfatı məhsullarının qiyməti sabit qalıb
Azərbaycan, Bakı, 18 dekabr/ Trend / 2008- ci ilin noyabrında Azərbaycanda kənd təsərrüfatı məhsullarının istehsal qiymətləri əvvəlki ayla müqayisədə, demək olar ki, dəyişməz qalıb, - Dövlət Statistika Komitəsi xəbər verir.
Bununla belə, 11 ay ərzində, 2007-ci ilin eyni dövrü ilə müqayisədə 12,5 faizlik artım müşahidə olunub, - komitə bildirir.
Oktyabrla müqayisədə, noyabrda bitkiçilik və bostançılıq məhsullarının qiymətində 0,2 faiz azalma müşahidə olunub. Meyvə və fındıq 0,4 faiz, ixtisaslaşmış bağçılıq məhsulları 0,9 faiz bahalaşıb, dənli bitkiləri isə, əksinə, 0,5 faiz ucuzlaşıb.
Ötən ayla müqayisədə, heyvandarlıq məhsullarında da sabitlik müşahidə edilib. İribuynuzlu mal-qara və onun məhsullarının qiyməti 0,3 faiz artıb, xırdabuynuzlu mal-qaranın qiymətində isə 0,5 faiz azalma müşahidə olunub.
Meşə təsərrüfatı və balıqçılıq məhsullarının qiymətləri dəyişməz qalıb.
