Azərbaycan, Bakı, 19 dekabr/ Trend , müxbir Ü.İsmayılova/ Oktyabrla müqayisədə, noyabrda Bakının təkrar daşınmaz əmlak bazarında bir kvadratmetr yaşayış sahəsinin qiyməti 2,4 faiz - 1544 dollaradək azalıb, - "Əmlak Bazarı İştirakçıları" İctimai Birliyindən cümə günü bildiriblər.
"Əsasən "Stalin" və "Xruşşov" layihəli binaların planlaşdırılan uçurulması barədə bəyanatlar təsir göstərib, nəticədə onların qiymətləri müvafiq olaraq, 6,4 və 3,3 faiz düşüb", - təşkilatdan bildirblər.
Ölkə hökuməti mənzil fondunun yenilənməsi çərçivəsində, "Stalin" və "Xruşşov" layihəli binaların sökülməsi haqqında Dövlət Proqramı hazırlayır, - Azərbaycanın Daşınmaz Əmlakın Dövlət Reyestri Xidmətinin rəhbəri Arif Qaraşov əvvəllər bildirib. Belə layihəli binalar, əsasən, Bakının mikrorayonlarında yerləşib.
Noyabrda təkrar bazarda mənzillərin alqı-satqısı haqqında müqavilələrin bağlanılması dinamikası 14,9 faiz azalıb. Bazara təkliflər 8,9 faiz azalıb ki, bu da qiymətlərə təsir göstərib. Noyabrda əmlakın ekspozisiya müddəti daha beş gün - 92 günədək artıb və bu, fəallığın və bazarın likvidliyinin azalması, həmçinin, risklərin artması ilə bağlıdır.
Müəlliflə əlaqə saxlamaq üçün elektron ünvan: [email protected]