Azərbaycan, Bakı, 12 yanvar / Trend , müxbir S.Babayeva/ "Azərbaycanda "quş qripi"nin qarşısının alınması üzrə 2009-cu ildə ilk monitorinq başlayıb", - deyə bazar ertəsi Azərbaycanın Kənd Təsərrüfatı Nazirliyi yanından Dövlət Baytarlıq Xidmətinin mətbuat katibi Yolçu Xanvəli bildirib.
"Yanvarın 12-də başlanan monitorinq iki həftə davam edəcək, çöl və ev quşlarından götürülən nümunələrin laboratoriya araşdırmalarının nəticələri yanvarın 23-də elan olunacaq", - deyə Xənvəli deyib.
Abşeron yarımadası və ona yaxın əraziləri, həmçinin Dəvəçi, Salyan, Ağcəbədi, Lənkəran və Xəzərin sahilyanı zolağını əhatə edən monitorinq tərkibi Səhiyyə, Kənd Təsərrüfatı, Ekologiya və Təbii Sərvətlər nazirlikləri və Azərbaycan Ovçular Cəmiyyətinin əməkdaşlarından ibarət xüsusi işçi qrup tərəfindən aparılır.
Hazırda köçəri quşların fəal miqrasiyası müşahidə olunur və bu, martadək davam edəcək. Lakin bununla yanaşı ölkədə epizodik vəziyyət Dövlət Xidməti tərəfindən stabil qiymətləndirilir. Bu səbəbdən monitorinqlər ayda bir dəfə keçirilir, lakin zərurət yaranarsa, onların sayı artırılacaq.
Əvvəllər aparılan monitorinqlər ölkədə "quş qripi" virusu olmadığını göstərib.
Məqalə müəllifi ilə əlaqə ünvanı - [email protected]
