Azərbaycan, Bakı, 26 yanvar/ Trend , müxbir İ.Xəlilova/
Azərbaycanda dəmir yolu ilə tranzit və ticarətə yardım layihəsinin həyata keçirilməsi ilə bağlı vəziyyəti aydınlaşdırmaq məqsədilə, yanvarın 26-da Dünya Bankının nəqliyyat üzrə baş mütəxəssisi və layihə qrupunun rəhbəri Cerald Olivyenin rəhbərlik etdiyi missiyanın Bakıya səfəri başlayıb, - DB-nin Bakı nümayəndəliyindən bazar ertəsi bildiriblər. Dəmir yolunda tranzit və ticarətə yardım layihəsinin dəyəri 673,8 mln. dollardır.
DB hələ ötən ilin martında bu layihənin həyata keçirilməsi üçün ölkəyə 450 mln. dollar kreditin ayrılmasını təsdiqləyib. Onun icrasının yubanması səbəbi ondan ibarətdir ki, layihənin həyata keçirilməsi yalnız Azərbaycanın dəmir yolu infrastrukturunun təkmilləşdirilməsi ilə əlaqədar Dövlət Proqramının (2008-2013-cü illər) qəbulundan sonra mümkündür. Dövlət proqramının ümumi dəyəri 1,2 mlrd. manatdır. Lakin hazırda bu proqram hələ təsdiqlənməyib.
"Missiya proqramın qəbulu və müvafiq olaraq, dəmir yolu layihəsinin həyata keçirilməsi ilə bağlı vəziyyəti müəyyənləşdirmək niyyətindədir", - nümayəndəlikdən qeyd ediblər.
Kredit ehtiyatları Beynəlxalq Yenidənqurma və İnkişaf Bankının xətti ilə dörd il güzəştli dövr olmaqla 17 il müddətinə və libor+0,05 faiz dərəcə üzrə təqdim edilib. Qalan hissə Azərbaycan hökumətinin payı hesabına təmin olunacaq.
Layihə üç komponentdən ibarətdir. Birinci komponent üzrə dəmir yolu təsərrüfatının, daha dəqiqliklə Bakıdan Gürcüstan sərhədinədək dəmir yolu sahəsinin bərpası, 3,3 kV daimi cərəyandan 25 kV dəyişən cərəyana keçid, elektrik təchizatı sisteminə keçidlə əlaqədar siqnal sisteminin əvəzlənməsi nəzərdə tutulur.
İkinci komponent çərçivəsində 50 elektrik lokomotivinin alınması, üçüncü - Dəmir Yolu İdarəsinin müasirləşdirilməsi və onun fəaliyyətinin bazar iqtisadiyyatının tələblərinə yaxınlaşdırılması planlaşdırılır. Hazırda hökumətdə onun səhmdar cəmiyyətə çevrilməsi məsələsi artıq nəzərdən keçirilir. Layihə 4 ilə hesablanıb.
Borc götürülmüş vəsatilər qismən (235 mln. dollar) dövlət büdcəsinin vəsaitləri hesabına, qalan 215 mln. dollar - Azərbaycan Dövlət Dəmir Yolunun şəxsi vəsaitləri hesabına ödəniləcək.
Bankın missiyası Nəqliyyat Nazirliyi və ADDY İdarəsində görüşlər keçirəcək.
Yanvarın 26-na olan cari mübadilə məzənnəsi -- 0,8052 AZN/USD.
Müəlliflə əlaqə saxlamaq üçün elektron ünvan: [email protected]
