Azərbaycan, Bakı, 27 yanvar/ Trend , müxbir Ü.İsmayılova/
Azərbaycanda icbari tibbi sığortanın mart-apreldə tətbiq olunacağı gözlənilir, - parlamentin Sosial siyasət daimi komissiyasının rəhbəri Hadı Rəcəbli çərşənbə axşamı bildirib.
"Yaxın 20 gündə Azərbaycanın Nazirlər Kabineti yanında İcbari Tibbi Sığorta Agentliyinin Əsasnaməsinin təsdiqlənəcəyi gözlənilir", - Rəcəbli deyib.
Onun sözlərinə görə, Əsasnamə təsdiq edildikdən sonra Agentlik əvvəlcə Siyəzən rayonunda sınağa, sonra isə bütün ölkə ərazisi üzrə aktiv fəaliyyətə başlayacaq.
Azərbaycanda icbari tibbi sosial sığorta sisteminin yaradılması Dünya Bankının səhiyyə sistemində islahatların aparılması layihəsi çərçivəsində həyata keçirilir. Layihə tibb xidmətlərinin keyfiyyətinin yaxşılaşdırılmasına yönəlib.
2008 - ci ilin dekabrında Azərbaycanın Nazirlər Kabineti yanında İcbari Tibbi Sığorta Agentliyi yaradılıb. 2008 - ci ilin dövlət büdcəsindən sistem tətbiqi üçün 1,4 mln. manat ayrılıb, 2009 - cu ilin büdcəsində 51,11 mln. manat nəzərdə tutulub.
Yaxın vaxtlarda Nazirlər Kabineti tərəfindən tibbi sığorta çərçivəsində göstərilən ilkin tibbi yardım xidmətlərinin siyahısı təsdiq ediləcək və siyahıya təxminən 190 xidmət daxil olacaq.
Əhalinin gəlirlərindən icbari tibbi sığortaya ayırmaların məbləği hazırlıq işləri başa çatdıqdan sonra dəqiqləşdiriləcək. Digər ölkələrin təcrübəsi nəzərə alınmaqla, çox ehtimal ki, o, təxminən 2,5-3 faiz təşkil edəcək, - Rəcəbli əvvəllər deyib.
Bu prosesdə ən çətin məqam dövlət agentliyinin xərclərinin idarə edilməsidir. Bunun üçün səhiyyə şəbəkəsinin formalaşdırılması tələb olunur və əhalini tibbi sığorta üzrə fərdi uçotun aparılması barədə məlumatlandırmaq lazımdır. Müvafiq olaraq, vətəndaşlar, ödənilmiş vəsaitlərdən asılı olaraq, tibbi sığorta alacaqlar.
Azərbaycanın Dövlət Sosial Müdafiə Fondu icbari sosial sığorta ayırmalarının yığılması təcrübəsini nəzərə alaraq, əvvəllər tibbi sığorta vəsaitlərinin yığılmasında öz iştirakını təklif edirdi. Lakin Rəcəblinin sözlərinə görə, prezidentin sərəncamına əsasən, vəsaitlərin yığılması ilə Agentlik məşğul olacaq.
Dövlət Sosial Müdafiə Fondunun apardığı araşdırmalara əsasən, hər il ölkədə tibbi xidmətə 200 mln. dollar səfr olunur. Bu günə yalnız bəzi birgə müəssisə və bir sıra şirkətlərdə tibbi sığorta aparılır.
Yanvarın 22 - nə olan cari mübadilə məzənnəsi -- 0,8048 AZN/USD.
Müəlliflə əlaqə saxlamaq üçün elektron ünvan: [email protected]