Azərbaycan, Bakı, 03 fevral / Trend müxbir S.Babayeva/ Dünya Bankı ilə birgə maliyyələşdirilən II "Kənd təsərrüfatının inkişafı və kreditləşməsi" layihəsi çərçivəsində "Müsabiqə qrantları" proqramının növbəti mərhələsinin qalibləri layihələrin həyata keçirilməsi üçün birinci tranş vəsaitlərini alıblar, - Kənd Təsərrəüfatı Nazirliyinin Elmi-Aqrar Mərkəzindən çərşənbə axşamı bildiriblər.
"Tranş, qrantın ümumi məbləğinin 30 faizini təşkil edir", - Mərkəzdən qeyd ediblər.
Azərbaycan Kənd Təsərrüfatı Nazirliyi yanında Kənd Təsərrüfatı Kreditləri üzrə Dövlət Agentliyi "Müsabiqə qrantları" proqramının qalibləri qismində 26 layihənin seçildiyini elan edib. Bunlar istehsal keyfiyyəti və standartlarının yaxşılaşdırılması, kənd təsərrüfatı məhsullarının saxlanılması və emalı, yeni məhsulun çeşidlənməsi, məhsuldan sonra itkilərin azaldılması, məhsulların qablaşdırılması, biznesin idarə edilməsi, ən yaxşı biznes-təcrübə üzrə və başqa layihələrdir. Layihələr Cəlilabad, Lənkəran, Masallı, Qazax, Gədəbəy, Samux, Şəmkir, Şəki, Oğuz, Zaqatala, İmişli, Ağcabədi rayonları və Naxçıvan Muxtar Respublikasında həyata keçiriləcək.
Hər layihəyə görə təqdim edilən qrantın məbləği orta hesabla 22 min dollar təşkil edib. Hər bir layihənin həyata keçirilmə müddəti - altı aydan 1 ilədəkdir.
"Bu layihələr regionlarda kənd təsərrüfatı məhsullarının keyfiyyətinin, eləcə də bu sahədə çalışan sahibkarların sosial vəziyyətinin yaxşılaşdırılmasına yönəlib", - Mərkəzdən bildiriblər.
Dövlət Agentliyi artıq analoji müsabiqə elan edib və layihələr üzrə ərizələr martın əvvəlinədək qəbul ediləcək.
Müəlliflə əlaqə saxlamaq üçün elektron ünvan: [email protected]