Azərbaycan, Bakı, 21 fevral / Trend , N.İsmayılova/ "Dünya Bankı qrupunun üzvü, Beynəlxalq Maliyyə Korporasiyası (BMK) korporativ idarəetmə sahəsində Azərbaycanın AZEL şirkəti ilə birgə pilot layihəni başa çatdırıb", - mətbuat konfransında BMK-nın Avropa və Mərkəzi Asiyada baş meneceri Tomas Telma deyib.
"Şirkətdə korporativ idarəetmənin uğurlu tətbiqi, maliyyə resurslarının cəlb edilməsi işində imkanlarının genişlənməsinə yardım edəcək", - Telma bildirib.
BMK-nın korporativ idarəetmənin tətbiqi layihəsində iştirakı AZEL şirkətinə sədrlik və müşahidə şurası yaratmağa, daxili audit təcrübəsini mükəmməlləşdirməyə və korporativ katib vəzifəsini yaratmağa imkanı verib. Şirkətə həmçinin 2,7 milyon dollar həcmində kredit xətti ayrılıb.
"BMK-nın bizə təqdim etdiyi sərmayə və məsləhətlər, şirkətdə korporativ idarəetmənin uğurlu tətbiqinə gətirib çıxartdı və onların bizə ayırdığı resurslardan səmərəli istifadə etmək imkanı verdi", - AZEL şirkətinin müşahidə şurasının sədri İqor Yakovenko deyib.
"BMK-nın layihəsinin birinci mərhələsinə AZEL də daxil olmaqla, altı şirkət daxil olub, - BMK-nın korporativ idarəetmə layihəsinin meneceri Karolina Brayt bildirib. - Hazırda biz ikinci mərhələyə başlamaq niyyətindəyik və burada da altı şirkət iştirak edəcək".
Onun sözlərinə görə, hazırda BMK ikinci mərhələdə iştirak edəcək şirkətləri seçir və ilk dəfə seçilmişlərin adları qısa müddətdə açıqlanacaq.
BMK korporativ idarəetmə layihəsinin Azərbaycanda həyata keçirilməsinə 2005-ci ildə başlayıb. Bu günə qədər 360-dan çox şirkət bu layihəyə cəlb edilib və bunun üçün təxminən səkkiz milyon dollar sərmayə ayrılıb.
Məqalə müəllifi ilə əlaqə ünvanı: [email protected]