Azərbaycan, Bakı, 23 fevral/ Trend , müxbir N.Abdullayeva/ Azərbaycanın iqtisadi inkişaf naziri Şahin Mustafayev və İordaniyanın sənaye və ticarət naziri Amer Hadid Əmmanda Azərbaycan ilə İordaniya arasında iqtisadi əməkdaşlığın perspektivlərini müzakirə edəcəklər.
Azərbaycanın bu ölkədəki səfiri Elman Araslının İordaniyadan bazar ertəsi telefonla Trend -a verdiyi məlumata görə, fevralın 25-26-da İordaniya ilə Azərbaycan arasında iqtisadi və texniki əməkdaşlıq üzrə hökumətlərarası komissiyanın iclası keçiriləcək.
Araslı bildirib ki, tərəflər ticari-iqtisadi, sənaye-energetika, rabitə və informasiya texnologiyaları, kənd təsərrüfatı, nəqliyyat, mədəniyyət, turizm, səhiyyə sahələrində əməkdaşlığın perspektivlərini müzakirə edəcəklər. İclasın yekununda komissiyanın həmsədrləri protokol imzalayacaqlar. Sənəddə komissiyanın məqsədləri və ikitərəfli əməkdaşlığın yeni perspektivləri öz əksini tapacaq. Nümayəndə heyətinin tərkibinə hökumət üzvləri, həmçinin ölkənin aparıcı şirkətlərinin nümayəndələri daxil olacaq.
Səfər çərçivəsində Mustafayevin İordaniya hökumətinin nümayəndələri ilə görüşü nəzərdə tutulub.
Səfir bildirib ki, ümumilikdə iki il ərzində Azərbaycan və İordaniya arasında 27 saziş imzalanıb.
2008-ci ildə İordaniyadan Azərbaycana idxal 461,9 min dollar təşkil edib.
Məqalə müəllifi ilə əlaqə ünvanı - [email protected]
