Azərbaycan, Bakı, 26 fevral / Trend , müxbir N.İsmaylova / Dövlət Statistika Komitəsinin sədri Arif Vəliyevin sözlərinə görə, Azərbaycanda ümumi daxili məhsulun (ÜDM) həcminin artması təqribən aprel-may aylarından başlayacaq.
"Bu, ÜDM-nin enməsinin qarşısını almaq məqsədi ilə hökumətin həyata keçirdiyi bir sıra tədbirlər nəticəsində mümkün olacaq", - Vəliyev deyib.
Onun sözlərinə görə, yanvar ayında Azərbaycanın ÜDM-si 2,6 % azalsa da, digər ölkələrlə müqayisədə bu çox cüzi enmədi. Misal olaraq A.Vəliyev Ukraynanın adını çəkərək, orada ÜDM-nin azalmasının yanvar ayının göstəricilərinə əsasən 20 % təşkil etdiyini deyib.
"Düşünürəm ki, ÜDM-nin səviyyəsi enməyəcək və ötən ilki səviyyədə qalacaq", - Dövlət Statistika Komitəsinin sədri vurğulayıb.
Cari qiymətlərdə ÜDM-nin göstəricisi 1860 milyon manat təşkil edib. Adambaşına düşən ÜDM-nin həcmi ötən ilin yanvar ayı ilə müqayisədə 19,6 % geriləyərək 215,9 % təşkil etmişdir.
Fevralın 26-na olan rəsmi məzənnə 0,8052 AZN/USD təşkil edir.
Məqalə müəllifi ilə əlaqə ünvanı: [email protected]