Azərbaycan, Bakı, 02 mart / Trend , müxbir S.Babayeva / Azərbaycan Standartlaşdırma, Metrologiya və Patentləşdirmə üzrə Dövlət Komitəsinin nümayəndə heyəti İslam Konfransı Təşkilatı (İKT) ölkələrinin işçi qrupunun "Halal" qida standartlarının tətbiq olunması barədə keçirilən iclasında iştirak edəcək, - komitədən bildiriblər.
Görüşün 25-26 mart ərəfəsində Səudiyyə Ərəbistanının Ciddə şəhərində keçirilməsi planlaşdırılır.
"İclasda yeni standartın hazırlanması ilə bağlı çağırışlar ümumiləşdiriləcək", - Dövlət Komitəsində deyiblər.
Ərzaq məhsullarına yeni qida standartlarının tətbiqi layihəsi ilkin olaraq İKT-nin 2008-ci il iyun ayında keçirilən işçi qrupunun iclasında hazırlanmışdır.
Təşkilatın Qahirədə baş tutacaq növbəti yığıncağında "Halal" standartının üzv ölkələr tərəfindən qəbul olunacağı gözlənilir. May ayında isə Kuala-Lumpurda forum çərçivəsində "Halal" qida standartının təqdimat mərasiminin keçirilməsi planlaşdırılır.
İKT İslam ölkələrinin beynəlxalq təşkilatıdır. Təşkilat sosial, siyasi, iqtisadi sahələrdə əməkdaşlıq və müstəmləkəçiliyə, neomüstəmləkəçiliyə və irqçiliyə qarşı mübarizə məqsədi ilə 1969-cu il 25 sentyabr tarixində Rabatda keçirilən müsəlman dövlətləri başçılarının konfransında yaradılmışdır.
İKT-nin mənzil-qərargahı Ciddə şəhərində yerləşir. Azərbaycan 1991-ci ildən etibarən təşkilatın üzvüdür.
Məqalə müəllifi ilə əlaqə ünvanı: [email protected]
