Azərbaycan, Bakı, 10 mart / Trend , müxbir E.İsmaylov /
SOCAR şirkətinin (Azərbaycan Respublikası Dövlət Neft Şirkəti) vitse-prezidenti Muxtar Babayevin sözlərinə görə, Azərbaycanda Azərbaycan-Özbəkistan alyansının birgə istehsal edəcəyi sorbent neftlə çirklənmiş ərazilərin təmizlənməsində və ölkədəki neft yataqlarında yığılıb qalan neft tullantılarının qurudulmasında istifadə olunacaq.
Fevral ayının sonunda Azərbaycana məxsus "Ekol Mühəndislik Xidmətləri" QSC və Özbəkistana aid "Ekonordragmet" şirkəti Bakıda sorbent istehsalı ilə bağlı müqavilə imzalayıblar.
"Bu layihəyə hər iki tərəfdən sərmayə yatırılacaq. Sorbent istehsalında patent sahibi Özbəkistan tərəfidir. Beləliklə, onlar tərəfindən sərmayə yatırılacaq, Azərbaycan tərəfindən isə Ekol-un infrastrukturu istifadəyə veriləcək ", - Babayev deyib.
Onun sözlərinə əsasən, Ekol layihənin texniki tərəflərini baxışdan keçirir.
Lazımi sərmayənin həcmini açıqlamayan Babayev deyib ki, məbləğ hələ dəqiqləşdirilməyib.
2006-cı il martın 1-də Abşeron yarımadasının ekoloji problemlərini aradan qaldırmaq məqsədi ilə yaradılan Ekol-un həmtəsisçiləri SOCAR (51% ) və Lancer S.A. Services (49%) şirkətləridirlər.
Özbəkistan-Britaniya birgə müəssisəsi olan "Ekonordragmet" isə 2006-cı ilin 15 fevralında yaradılıb.
Məqalə müəllifi ilə əlaqə ünvanı: [email protected]
