Azərbaycan, Bakı, 16 aprel / Trend , müxbir N.İsmayılova /
Ölkə prezidenti İlham Əliyev tərəfindən aprelin 14-də imzalanmış Azərbaycan regionlarının 2009-2013-cü illərdə sosial-iqtisadi inkişafı üzrə Dövlət Proqramındakı tədbirlər planına müvafiq olataq, 2014-cü ilə qədər Bakıdakı bütün böyük müəssisələrin özəlləşdirilməsinin başa çatdırılması nəzərdə tutulub.
Proqrama əsasən, 2014-cü ilə qədər Bakı və ona yaxın qəsəbələrdə özəlləşməyə açıq olan böyük müəssisələrin özəlləşdirilməsinin başa çatdırılması planlaşdırılır. Bunun yerinə yetirilməsi Dövlət Əmlakının İdarə Edilməsi üzrə Dövlət Komitəsinə həvalə edilib.
Həmçinin paytaxtda yüngül və qida sənayesi, eləcə də tikinti materiallarının istehsalının genişləndirilməsi sahəsində işləyən müəssisələrin dəstəklənməsi də davam etdiriləcək.
Respublika əhəmiyyətli tədbirlər planında 2014-cü ilə qədər özəlləşməyə açıq olan müəssisələrin özəlləşdirilməsi prosesinin sürətləndirilməsi, orta və böyük müəssisələrin mülkiyyət formalarının səhmdar cəmiyyətlərə dəyişdirilməsi və onların səhmlərinin satışı nəzərdə tutulub.
2008-ci ildə Azərbaycanda 1800 kiçik dövlət müəssisəsi və obyekt özəlləşdirlib, orta və böyük dövlət müəssisələrinin bazasında isə 10 səhmdar cəmiyyət yaradılıb.
2003-cü ildə 1677, 2004-cü ildə - 1954, 2005-ci ildə - 2463, 2006 -cı ildə - 3063 kiçik müəssisə və obyekt özəlləşdirilib.
Məqalə müəllifi ilə əlaqə ünvanı: [email protected]