Azərbaycan, Bakı, 28 aprel / Trend , müxbir N.İsmayılova /
2009-cu ilin birinci rübündə Azərbaycanın qiymətli kağızlar bazarının həcmi 1,88 milyard manat təşkil edib. Bu barədə Qiyməli Kağızlar üzrə Dövlət Komitəsi məlumat verib.
Qeyd olunan məbləğdən ilkin bazarın payına 18,5%, təkrar bazarın payına isə 81,5% düşür.
"Birinci rübdə ölkənin fond bazarı qlobal maliyyə böhranı şəraitində dayanıqlı və möhkəm olduğunu göstərdi. Bu dövr ərzində səhm bazarında fəallıq artıb, lakin təkrar bazarda aparılan əməliyyatlar fəaliyyət baxımından ilkin bazarı üstələyib", - məlumatda deyilib.
Hesabat dövrü ərzində 347,7 milyon manat dəyərində qiymətli kağız dövriyyəyə buraxılıb və bunun 47%-i Mərkəzi Bankın payına düşür.
Hesabat dövrü ərzində təkrar qiymətli kağız bazarının həcmi ötən ilin analoji dövrü ilə müqayisədə 1,7% artaraq 1,536 milyard manat təşkil edib ki, bunun da 82,4%-i Mərkəzi Bank notları ilə repo və təkrar repo əməliyyatlarının payına düşür.
Ötən ilin analoji dövrü ilə müqayisədə səhm bazarı da 4,7 dəfə artıb. Səhmlərin həcmi 129 milyon manat təşkil edib ki, bunun da 62%-i ilkin bazarın, 38%-i isə təkrar bazarın payına düşüb.
Birinci rüb ərzində səhmlərin təkrar bazarının ümumi həcmi 47,8 milyon manat təşkil edib ki, bu da ötən ilin analoji dövr göstəricisini 3,5 dəfə üstələyir.
Bakı Fond Birjasında təkrar bazarda səhm ticarəti 662 dəfə artaraq 28,5 milyon manat təşkil edib. Təkrar bazarda dövriyyədə olan səhmlərin 92%-i maliyyə sektorunun, 4%-i emal sahəsinin, 2,5%-i isə nəqliyyat sektorunun payına düşür.
Aprelin 28-nə olan rəsmi məzənnə 0,8036 AZN/USD təşkil edib.
Məqalə müəllifi ilə əlaqə ünvanı: [email protected]