Azərbaycan, Bakı, 20 may / Trend , müxbir Ü.İsmayılova /
"Baltika-Bakı" şirkətinin vergi tutumu cari ildə ötən ilin analoji dövrü ilə müqayisədə 12 faiz artıb. Bu barədə "Baltika" pivə xəttinin Bakıda təqdimatı zamanı çərşənbə günü Azərbaycanın iqtisadi inkişaf nazirinin müavini Niyazi Səfərov deyib.
"Baltika" şirkətinin qlobal maliyyə böhranı şəraitində qida sənayesi sferasında bu cür iri layihəni həyata keçirməsi Azərbaycanda əlverişli investisiya iqliminin olmasından və ölkənin yüksək iqtisadi potensialından xəbər verir", - nazir müavini qeyd edib.
"Bakı-pivə" qida şirkəti 1969-cu ildə istismara verilib və SSRİ-nin ən iri altı pivə müəssisələrindən biri olub. 1997-ci ildə şirkət Fransanın "Group Castel" konserninin idarəçiliyi altına keçib. 2008-ci ilə kimi müəssisənin məhsulları Azərbaycan pivə bazarının 70 faizini əhatə edib. 2008-ci il mayın 15-də "Baltika" şirkəti və "Brasseries International Holding (Eastern)" Ltd pivə zavodunun alınması barədə razılaşma imzalayıblar. Azərbaycan antiinhisar orqanları tərəfindən saziş bəyənildikdən sonra 2009-cu ilin əvvəlindən etibarən şirkətin adı dəyişdirilərək "Baltika-Bakı" olub.
Məqalə müəllifi ilə əlaqə ünvanı: [email protected]
