Azərbaycan, Bakı, 26 may / Trend , müxbir E.İsmayılov /
Azərbaycanın Nəqliyyat Nazirliyi yayda Cənubi Koreyanın Daewoo şirkətinin istehsalı olan 200 ədəd çoxtutumlu yeni avtobus əldə etməyi planlaşdırır. Bu barədə Nəqliyyat Nazirliyinin mətbuat xidmətinin rəhbəri Namiq Həsənov bildirib.
"İyun-iyul aylarında Koreyanın Daewoo şirkətinin istehsalı olan çoxtutumlu avtobusları istismara vermək üçün gətirmək istəyirik", - Həsənov deyib.
Həsənovun sözlərinə əsasən, hazırda 700 ədəd orta və çoxtutmlu yeni avtobus istifadədədir.
"Ancaq hələ də 500-600 yeni avtobusa ehtiyac var", - Həsənov qeyd edib.
Nəqliyyat sisteminə iri avtobusların daxil edilməsi Nəqliyyat Nazirliyinin Bakının mərkəzi küçələrində aztutumlu avtobusların hərəkətinə qoyduğu qadağa ilə bağlıdır. Aztutumlu avtobuslardan ikinci dərəcəli yollarda istifadə edilə bilər. Bu tip avtobusların şəhərkənarı və Bakının mərkəzindən kənarda yerləşən küçələrdə hərəkətinə hələ ki icazə verilir.
Məqalə müəllifi ilə əlaqə ünvanı: [email protected]
