Azərbaycanda sosial sığortalı şəxslərin sayı artıb
Azərbaycan, Bakı, 01 iyun / Trend , müx. U.İsmayılova /
Azərbaycanda sosial sığorta olunmuş şəxslərin sayı ilin əvvəlinə 62,43 min artaraq 1,55 milyona çatıb, Dövlət Sosial Müdafiə Fondunun bazar ertəsi yaydığı məlumatda bildirilir. Onlardan 846 min nəfəri kişi və 706 min nəfəri qadındır.
Məlumatda deyilir ki, əsasən 40 yaşdan 50 yaşa qədər olan 434 min adam qeydiyyata alınıb. 30 yaşına qədər sığorta olunmuş şəxslər 358 min, 30 yaşdan 40 yaşa qədər 347 min, 50 yaşdan 60 yaşa qədər 293 min, 60 yaşdan yuxarı 118 min təşkil edib.
Şəxsi hesabat - Qanunvericiliyə uyğun olaraq, pensiya və digər sosial müdafiə hüquqları ilə təmin etmək məqsədi ilə hər bir sığorta olunmuş şəxs haqqında məlumatların hesabata alınması və toplanmasıdır.
Azərbaycan prezidentinin "Dövlət sosial sığorta sistemində şəxsi hesabat" haqqında qanunun tətbiq edilməsi barədə sərəncamı 2001-ci ilin dekabrında imzalanıb.
Azərbaycanda pensiyanın minimal səviyyəsi 75 manat təşkil edir.
Mayın 25-nə rəsmi məzənnə 0,8035 AZN/USD təşkil edir.
Məqalə müəllifi ilə əlaqə: [email protected]
