Azərbaycan, Bakı, 09 iyul / Trend , müxbir İ.Хəlilova /
"Fransanın Societe Generale korporativ və sərmayə bankı 2009-cu ilin sonuna qədər böyük sayda layihələrin maliyyələşdirilməsini gözləmir və bir-iki sövdələşmə bağlamaq fikrindədir", - cümə axşamı bankın Azərbaycandakı regional nümayəndəsi Teybə Quliyeva deyib.
"Mən ümid edirəm ki, bu il ötənilki kimi fəal olmasa da, bir o qədər məhsuldar olacaq", - Quliyeva bildirib.
Onun sözlərinə görə, bankın Azərbaycan üzrə portfeli 400 milyon avroya yaxındır. Onun bir hissəsi - 100 milyon avro bank sektorunun, qalanları isə neft-qaz sektoru və infrastruktur layihələrinin payına düşür.
"Bu gün bizim dövlət şirkətləri ilə müzakirə edilən bir neçə infrastruktur layihələri və ölkənin bank sektoru ilə bağlı layihələrimiz var", - nümayəndə qeyd edib.
Bank sektoru ilə istehsalat sektoru üçün avadanlıq və xidmətlərin alınması və onun idxalı, nou-hau texnologiyaların alınması ilə bağlı müqavilələrin əldə olunmasının maliyyələşdirilməsi imkanları müzakirə edilir. Bununla yanaşı, onun sözlərinə görə, avadanlığın Fransa və ya Avropa istehsalı olması vacib deyil.
"Azərbaycan iqtisadiyyatı regionda ən yaxşı nümunədir, ona görə də bütün bank dünyası ölkəyə böyük maraq göstərir və dünyanın bütün bankları fəal şəkildə əməkdaşlıq etməkdə davam edirlər, - Quliyeva deyib. - Azərbaycanda iqtisadi göstəricilər, bütün baza məqamları qonşu ölkələrdəkindən xeyli yaxşıdır".
Societe Generale Azərbaycanda 1998-ci ildən, Azərbaycan, Gürcüstan və Türkmənistanı əhatə edən regional nümayəndəliyi vasitəsilə fəaliyyət göstərir.
Bu gün bank sektoruna sərmayələr müxtəlif alətlər vasitəsilə həyata keçirilir: sindikatlaşdırılmış kredit, ticarət, layihə, ixrac maliyyələşdirilməsi.
Bank Azərbaycanda realizə olunan bir sıra əsas strateji layihələrdə uğurla iştirak edib. Onların içərisində "Azəri-Çıraq-Günəşli" yataqlarının genişmiqyaslı işlənməsi, "Bakı-Tbilisi-Ceyhan" marşrutu üzrə boru kəmərinin tikintisi üzrə layihələri göstərmək olar. Sonuncuda Societe Generale aparıcı səlahiyyətli təşkilatçı qismində çıxış edib. "Şahdəniz" qaz yatağının işlənməsi və Sumqayıtda 570 meqavatlıq elektrik stansiyasının tikintisi layihəsində Societe Generale birgə aparıcı təşkilatçı qismində çıxış edib.
Societe Generale-ın ən böyük sərmayəsi BTC olaraq qalır. Burada onun iştirakı 65 milyon dollar olub. Ümumi kredit həcmi 750 milyon dollar təşkil edib.
Məqalə müəllifi ilə əlaqə ünvanı: [email protected]