Azərbaycan, Bakı, 17 iyul / Trend , müxbir Ü. İsmayılova /
Azərbaycanın Kənd Təsərrüfatı Nazirliyi Azərbaycan hökumətinə taxıl idxalına gömrük rüsumu tətbiq edilməsi barədə təkliflə çıxış edib. Bunu cümə günü Trend -a kənd təsərrüfatı naziri İsmət Abbasov deyib.
"İdxal rüsumunun tətbiq edilməsi daxili taxıl istehsalının stimullaşdırılmasına səbəb olacaq", - nazir deyib.
Onun sözlərinə görə, hazırda taxıl idxalı zamanı yalnız ƏDV (18 faiz) alınır. Azərbaycanda gömrük idxal rüsumunun ən yüksək dərəcəsi 15 faiz təşkil edir. Lakin nazir taxıl üçün təklif olunan dərəcəni bildirməyib.
Abbasov deyib ki, təklif İqtisadi İnkişaf və Maliyyə nazirlikləri, Dövlət Gömrük Komitəsi ilə razılaşdırılıb və hazırda Azərbaycanın Nazirlər Kabinetinin müzakirəsindədir.
2009-cu ildə Azərbaycanda ərzaq taxılının istehsalı artıq 1,6 milyon ton təşkil edib. Bununla belə, ölkədə ərzaq taxılına illik tələbat 1,53 milyon tondur. Bu il cəmi 2,2 milyon ton ərzaq taxılı yığılacağı gözlənilir. İlk yarımildə Azərbaycana 591 min ton ərzaq taxılı idxal edilib.
"Taxıl idxalının birdən dayandırılması iqtisadi cəhətdən doğru olmazdı. Lakin Azərbaycan artıq daxili tələbatı ödəməyə tam hazırdır. Buna görə də ölkənin taxıl idxalına ehtiyacı yoxdur", - Abbasov deyib.
Azərbaycan hökuməti 2010-cu ilədək taxıl idxalından tamamilə imtina etmək niyyətindədir. Bunu bir müddət əvvəl Abbasov deyib.
Azərbaycan əsasən Rusiya, Türkiyə və Qazaxıstandan taxıl idxal edir. Azərbaycanın taxıla illik tələbatı 3 milyon ton təşkil edir. Bunun bir milyon tonu idxal olunur. Ölkənin ərzaq taxılına illik tələbatı 1,53 milyon, aylıq tələbatı 129,64 min tondur. Ayda adambaşına 180 kiloqram taxıl düşür.
2008-ci il dekabrın sonunadək yaz mövsümü üçün 880 min hektar ərazidə taxıl əkini həyata keçirilib ki, bunun da 603 min hektarı ərzaq taxılı üçündür. Bu da 2009-cu ildə taxıl istehsalını 250-300 min ton artırmağa imkan verib.
Məqalə müəllifi ilə əlaqə ünvanı: [email protected]
