Azərbaycan, Bakı, 1 avqust / Trend , müxbir İ. Xəlilova/
Cari layihələrin gözdən keçirilməsi üçün Səudiyyə İnkişaf Fondunun missiyası Azərbaycana gəlib. Bu barədə şənbə günü ölkə hökumətindən məlumat verilib.
"Fondun missiyası Bakıətrafı kənd və qəsəbələrin su təchizatı və kanalizasiya sisteminin tikilməsi və yenidənqurulması layihəsi üzrə kredit müqaviləsinin layihə variantını da gətirib", - hökumətdən deyilib.
İyulda Səudiyyə Fondunun Direktorlar Şurası layihəninin maliyyələşdirilməsi üçün 93,75 milyon Səudiyyə rialı (təxminən 25 milyon dollar) civarında kredit ayrıldığını bəyan edib. Hazırda missiya "Azərsu" SC ilə kreditin istifadəsinin şərtlərini və istiqamətini müzakirə edir.
Səudiyyə Fondu layihələrin dəyərinin 50 faizini maliyyələləşdirir, yerdə qalan hissəni isə Azərbaycan hökuməti öz üzərinə götürür. Kredit resursları 5 illik güzəştli dövrlə 20 il müddətinə illik iki faizlə verilir. Layihənin həyata keçirilmə dövrü və onun əhatəsi hələ müəyyənləşdirilməyib.
Bu günə qədər fond Azərbaycanda üç layihə maliyyələşdirib. Bakıda beş məktəbin tikintisi üçün 9,5 milyon dollar, Samur-Abşeron kanalının Vəlvələçay-Taxtakörpü hissəsinin yenidən qurulması üçün 18 milyon dollar və Gəncə-Yevlax avtomagistralı üçün 13 milyon dollar ayrılıb. Fondun missiyası son iki layihəni gözdən keçirəcək.
Məqalə müəllifi ilə əlaqə ünvanı: [email protected]
