Azərbaycan, Bakı, 04 avqust / Trend , müxbir E.İsmayılov /
"Azərbaycan hava yolları" QSC və İsrail tərəfi Bakı-Təl-Əviv marşrutu üzrə aviareyslərin həyata keçirilməsi barədə danışıqları davam etdirirlər. Bu barədə çərşənbə axşamı QSC-nin mətbuat xidmətinin rəhbəri Məhərrəm Səfərli deyib.
"İsrail tərəfi Azərbaycan tərəfinin qəbul etmədiyi müəyyən təkliflə çıxış edib. Lakin avqustun 20-dək (uçuşların dayadırılmasının ilkin müddəti) vaxt var", - Səfərli deyib.
Keçən il İsrailin "Arkia" aviaşirkəti Təl-Əviv - Bakı reysinin reallaşdırılması üçün lisenziya alıb. Lakin uçuşun həyata keçirilməsi üçün İsrail aviaşirkəti təhlükəsizlik məsələsi qaldırıb. İsrail KİV-in məlumat verdiyi kimi, aviaşirkət Azərbaycan tərəfinin gördüyü təhlükəsizlik tədbirlərini qeyri-qənaətbəxş hesab edir. Bu da "Arkia" təyyarələrinin Bakıya enməsinə imkan vermir. Öz növbəsində Azərbaycan nümayəndələri bununla razı deyil.
16 il müddətində bu istiqamətdə yalnız "AZAL" QSC-nin təyyarələri uçur. Bakı-Təl-Əviv-Bakı marşrutu üzrə uçuşlar həftədə iki dəfə - çərşənbə və bazar günləri həyata keçirilir. Təyyarələr Bakıdan saat 09:35-də havaya qalxır və həmin gün Bakı vaxtı ilə saat 17:50-də yerə enir.
Məqalə müəllifi ilə əlaqə ünvanı: [email protected]