Azərbaycan, Bakı, 12 avqust / Trend , müxbir E. İsmayılov /
"Azərbaycan Dəmir Yolları" QSC Bakı-Abşeron istiqaməti üzrə Zabrat II-Qala ərazisində elektrik dəmir yol xətlərinin demontajı çərçivəsində birinci mərhələyə başlayıb. Bunu çərşənbə günü QSC-nin mətbuat xidmətinin rəhbəri Nadir Əzməmmədov deyib. Bu xəttin demontajı üzrə işlərin bir ay müddətində başa çatdırılması planlaşdırılır.
"Hazırda müzakirələr aparılır, bu prosesdə iştirak edəcək işçilərə müxtəlif ərazilərdə görüləcək işlərlə bağlı tapşırıqlar verilir", - Əzməmmədov deyib.
Əzməmmədovun dediyi kimi, bu gün enerji təminatı və enerji təchizatı sisteminin demontajı prosesi başlamalıdır. Hər şey, xüsusilə də dəmir yol xətlərinin sökülməsi mərhələlərlə keçiriləcək, çünki bu prosesin reallaşması üçün xəttin üstündən xətlərin sökülməsini həyata keçirən qatar keçməlidir.
"Bu dəmir yol xəttinin demontajından sonra onun yerində avtomobil yolu salınacaq", - Əzməmmdov deyib.
Bu dəmir yol hissələrinin demontajının əsas səbəbi son illər elektrik qatarlarında sərnişin axınının azalması və bunun nəticəsi olaraq reyslərin gəlir gətirməməsi ilə əlaqədardır.
Dəmir yol xətti və digər texniki qurğular söküləcək, yararlı materiallar yolların digər hissələrində istifadə olunacaq.
30 kilometr uzunluğunda bir zolaqlı Zabrat II - Maştağa - Bağlar - Buzovna - Zuqulba - Sahil - Mərdakan - Qala dəmir yol xətti mərhələlərlə söküləcək. Demontajdan sonra ləğv edilmiş bu xəttin materialları ilk növbədə ikizolaqlı Zazalı-Gəncə, birzolaqlı Heybət-Biləcəri və ikizolaqlı Güzdək - Vaş - Xırdalan xətlərinin əsaslı təmiri zamanı istifadə olunacaq.
Məqalə müəllifi ilə əlaqə ünvanı: [email protected]
