Azərbaycan, Bakı, 22 avqust / Trend , müxbir Ü.İsmayılova /
Azərbaycan Quşçuluq Cəmiyyəti ölkədə quşçuluğun inkişafının dəstəklənməsi üçün hökumətdən vergi güzəştləri gözləyir. Bu haqda şənbə günü cəmiyyətin sədri Aydın Vəliyev deyib.
"Biz hökumətə idxal edilmiş yemin və quşçuluq sahəsi üçün lazım olan digər ərzaqların üzərindən ƏDV-nin götürülməsi ilə bağlı müraciət etmişik. Bu gün quşlar üçün yemin 90 faizi idxal edilir ki, bu da broyler fabriklərinə böyük məbləğ hesabına başa gəlir", - Vəliyev deyib. Ölkədə ƏDV-nin 18 faizlik vahid dərəcəsi qüvvədədir.
Onun sözlərinə görə, hazırda quşların saxlanması üçün böyük xərclər tələb olunduğundan quşçuluq fabrikləri problemlərlə üzləşir. Bu da Bakıda 2 böyük quşçuluq fabriki "Mərdəkan Broyler" və "Hövsan Broyler"in bağlanmasına gətirib çıxarıb.
"Fabriklərin təminatı üçün lazım olan vəsaitlərin çatışmaması sahibkarlar üçün problem yaradıb. Bu da toyuq yumurtasını və toyuq ətinin nəzərəçarpacaq dərəcədə qiymətinin artmasına gətirib çıxara bilərdi. Bu səbəbdən də həmin fabriklər ötən ilin oktyabr ayından fəaliyyətlərini dayandırıblar", - cəmiyyətin sədri deyib (həmçinin "Mərdəkan Broyler"in sədridir).
Bununla əlaqədar olaraq, Azərbaycan Quşçuluq Cəmiyyəti hökumətə güzəştli vergilər almaqla bağlı müraciət edib.
"Əgər hökumət bu sahədə bizi dəstəkləməsə, düşünürəm ki, broyler müəssisələrinin bağlanması tendensiyası davam edəcək. Çünki kiçik fabriklər artıq sıradan çıxıb", - Veliyev deyib.
Vəliyevin sözlərinə görə, quşçuluq fabrikləri tədricən öz fəaliyyətlərini iflas səbəbindən dayandırmağa başlayıblar.
Respublika Quşçuluq Cəmiyyətinin tərkibinə 27 müəssisə daxildir. Onlardan 26-sı quşçuluq kombinatı, yalnız biri baytarlıq dərman preparatlarının distrübüteridir. Quşçuluq sahəsində çalışan insanların sayı 15-20 min nəfər təşkil edir.
Məqalə müəllifi ilə əlaqə ünvanı: [email protected]
