Azərbaycan, Bakı, 29 sentyabr / Trend , müxbir Ü.İsmayılova/
Azərbaycan hökuməti xarici sərmayədarları dəyəri 2 milyard avro olan yay-qış turizm kompleksinin inşasına cəlb etmək niyyətindədir. Bu barədə çərşənbə axşamı Əbülfəs Qarayev mətbuat konfransında deyib.
"İnşaatın 25 faizi dövlət hesabına, 75 faizi isə özəl sektorun hesabına təmin ediləcək", - nazir deyib. Onun sözlərinə görə, sərmayədarların cəlb edilməsi prosesi gələn ilə planlaşdırılıb.
"Baş podratçı müəyyən edilib. Beynəlxalq sərmayədarların kapitalı servis infrastrukturunun yaradılması üçün cəlb ediləcək", - nazir deyib.
"Lakin buna baxmayaraq, səırmayədarlar hazırlanmış layihə çərçivəsindən kənara çıxa bilməzlər", - Qarayev deyib.
Nazir hesab edir ki, "Şahdağ" qış istirahət zonasının inşasına dövlət hesabına qoyulan investisiyanın 7-10 ildən sonra ödəniləcəyi gözlənilir və kompleks hesabına 5 min yeni iş yeri açılacaq.
Qarayev həmçinin deyib ki, "Şahdağ" kompleksində Azərbaycanda ilk dəfə olaraq vahid idarə sistemi yaradılacaq. Qarayev əvvəllər deyib ki, kompleksin mərkəzi sahəsinin və iki əsas qaldırıcı stansiyanın tikintisi, səkkiz qaldırıcının və avadanlığın quraşdırılması, daxili yolların və komleksin infrasruktur sisteminin yaradılması 2011-ci ilə planlaşdırılır.
Qusar rayonunda tikiləcək "Şahdağ" turizm kompleksi 340 yerlik dördulduzlu oteldən, lift bazalarından, xizək məktəbindən, kanat yollarından, süni buz sistemindən və s. ibarətdir.
Komleksin layihəsini Avstriya, Almaniya və İsveçrədən olan mütəxəssislər hazırlayırlar.
Məqalə müəllifi ilə əlaqə ünvanı: [email protected]
