Türkmənistan, Aşqabad, 5 oktyabr / Trend , müxbir H.Həsənov/
Türkiyənin Rixos Hotel Group holdinqinin rəhbəri Fəttah Taminci Türkmənistan Prezidenti Qurbanqulı Berdımuhəmmədovla görüşdə şirkətinin Xəzər sahilində Avaz kurort zonasının tikintisinin reallaşdırılmasında maraqlı olduğunu bildirib.
Rəsmi tükmən mənbəsindən verilən məlumata görə, şirkət Avropa və Fars körfəzində də analoji layihələr həyata keçirir.
Türk iş adamı deyib ki, Rixos Hotel Group Türkmənistanla hərtərəfli əməkdaşlığın inkişafında maraqlıdır. Belə ki, bu ölkədə bir çox milli və regional əhəmiyyətli layihələr həyata keçirilir.
Berdımuhəmmədov da onunla görüşdə Türkmənistanın maraqlı olduğu sahələrə böyük sərmayə qoyuluşları üçün açıq və qarşılıqlı əməkdaşlığa hazır olduqlarını qeyd edib.
Avqustda Türkiyə Prezidenti Abdullah Gül Xəzər sahilində dəniz-kurort zonasının "böyük gələcəyi"nə işarə edərkən deyib ki, Türkmənistanın milli iqtisadiyyatı üçün perspektivli olan bu sahənin inkişafı effektiv olacaq. O, bu haqda Antalyada keçirilən investisiya forumunda çıxışı zamanı bildirmişdi.
Türkiyənin turizm sərmayəçiləri cəmiyyətinin rəhbəri Turqut Gür deyib ki, onlar turizm sahəsində zəngin təcrübələrini Türkmənistanla bölüşməyə hazırdırlar.
Onun sözlərinə görə, Antaliya da bir zamanlar boş sahə olub və onun tikintisi sıfırdan başlayıb, gərgin əmək nəticəsində dünya səviyyəli kurort zonasına çevrilib.
Turizm sahəsi Türkmənistanın strateji planlarında xüsusi yer tutur. Bu sahədə işləyən investorlara, şirkətlərə vergi və gömrük güzəştləri verilir. Hazırda Xəzər sahilində tikilən obyektlərin ümumi qiyməti yarım milyard dollar təşkil edir.
Hazırda sürətlə yeni aeroportun, avtomagistral yolların, elektrostansiyaların, sutəmizləyici qurğuların quraşdırılması işləri həyata keçirilir. Oktyabrda da bir neçə sanatoriya-kurort zonası istifadəyə veriləcək. Avaz kurort sahəsinin tikilişi zamanı burada akvaparkların, yaxt klubların tikintisi də nəzərdə tutulur.
Berdımuhəmmədov Türkiyədə səfərdə olarkən deyib ki, Xəzərin Türkmənistan sahilləri özünün Arçman, Bayraməli, Mollakara, Yılısuv və s. kimi müalicəvi əhəmiyyəti kurort zonaları ilə dünyanın ən yaxşı kurort zonaları ilə müqayisı oluna bilər.