Azərbaycan, Bakı, 06 oktyabr / Trend , müxbir N.İsmayılova/
Dünya Bankı (DB) sentyabrın 27-dən oktyabrın 3-dək bankın ölkə üzrə layihə portfelinin icmalını aparıb. Nəticələrə görə bəzi layihələrin maliyyələşmə sürəti artırılacaq. Bu barədə çərşənbə günü DB-nin Bakı nümayəndəliyindən deyilib.
"İcmal iki ildən bir cari layihələrin həyata keçirilməsi effektivliyinin yaxşılaşdırılması məqsədilə aparılır, - nümayəndəlikdən deyilib. - Son icmal uğurlu olub".
"İcmalın nəticələrinə görə, bir neçə layihə üzrə vəsaitlərin xərclənməsinin yaxşılaşdırılmasına dair qərar qəbul ediləcək", - nümayəndəlikdən deyilib.
"Bura ekoloji və dəmiryol layihələri aiddir. Bu layihələr təsdiq edilsə də, onların maliyyələşməsi hələ başlanmayıb, - nümayəndəlikdən deyilib. - Bu layihə üzərində aparılan işləri fəallaşdırmaq qərarına gəlinib".
Bankın sabit inkişaf departamentinin direktoru Piter Tomson icmal üçün ölkədə olub.
Azərbaycan 1992-ci ildən DB-nin üzvüdür. Əməkdaşlıq dövründə bank tərəfindən respublikaya 2,5 milyard dollar məbləğində kreditlərin verilməsi bəyənilib.
Dünya bankı 2010-cu maliyyə ilində yol inşaatı (Bakı-Şamaxı yolu), ekologiya, təhsil (ali təhsil sistemində islahatlar) və digər layihələrinin təsdiq edilməsini gözləyir.
2009-cu ilədək DB Azərbaycanda ümumi dəyəri iki milyard dollardan çox olan 45 layihə maliyyələşdirib. Təkcə keçən maliyyə ilində bank tərəfindən 13 layihənin maliyyələşdirilməsinə 1,251 milyard dollar yönəldilib. Strategiyanın son iki ilində (2009-2010-cu illər) DB ölkəyə bir milyard dollardan çox vəsait ayırmağa hazır olduğunu bildirib. Bu vəsait artıq kommersiya şərtləri ilə Beynəlxalq Yenidənqurma və İnkişaf Bankının xətti ilə veriləcək.
2009-cu ildə DB Azərbaycan üçün ümumi məbləği 183 milyon dollar olan yeni borc paketini bəyənib. Ondan 70 milyonu Beynəlxalq İnkişaf Assosiasiyası xətti ilə ayrılıb. Ümumi paketdən 175 milyon dollar Hacıqabul-Bəhramtəpə avtomobil yolunun təmirinə və modernləşdirilməsinə, səkkiz milyon dollar isə əsas sahələrdə, daha öncə isə infrastrukturların inkişafı sahəsində investisiya layihələrinin həyata keçirilməsi zamanı hazırlığın keyfiyyətinin artırılmasına hesablanıb.
Məqalə müəllifi ilə əlaqə ünvanı: [email protected]
