Azərbaycan, Bakı, 06 oktyabr / Trend , müxbir Ü.İsmayılova/
Standartlaşma, Metrologiya və Patent üzrə Dövlət Komitəsinin sədri Ramiz Həsənov Ümumdünya İntellektual Mülkiyyət Təşkilatının (WIPO) assambleyasında iştirak edib. Assambleya 22 sentyabr-1 oktyabr tarixləri arasında Cenevrədə keçirilib. Bu barədə çərşənbə axşamı Dövlət Komitəsindən məlumat verilib.
Assambleya çərçivəsində komitə sədri WIPO-nun baş direktoru Frensis Harri ilə görüşüb.
Görüş zamanı əməkdaşlıq sahəsinin genişləndirilməsi, tədris mərkəzinin yaradılması, informasiya-axtarış sisteminin avtomatlaşdırılması üzrə işlərin başa çatdırılması və həmçinin baş direktorun Azərbaycana mümkün səfərinə dair məsələlər müzakirə edilib.
Assambleya çərçivəsində həmçinin rəhbər şəxslərin iştirakı ilə "Dünyada baş verən qlobal proseslərin tənzimlənməsində intellektual mülkiyyətin rolu" mövzusunda konfrans keçirilib.
Bununla yanaşı, türkdilli dövlətlərin patent təşkilatlarının başçıları ilə görüşlər olub və bu ölkələr arasında gələcək əməkdaşlığın perspektivləri nəzərdən keçirilib.
Məqalə müəllifi ilə əlaqə ünvanı: [email protected]
