Azərbaycan, Bakı, 13 oktyabr / Trend , müxbir İ.Xəlilova/
Azərbaycanda qeyri-bank kredit təşkilatlarının nizamnamə fondunun minimum məbləği Mərkəzi Bankın qərarına uyğun olaraq müəyyənləşdiriləcək, AMB İdarə Heyətinin sədr müavini Alim Quliyev deyib.
Kredit verərkən girov əmlak almaq hüququ olan QBKT üçün qanun layihəsinin ilkin variantında nizamnamə fondu 75 min manat, bu hüququ olmayan kredit təşkilatlarına isə 25 min manat həcmində müəyyənləşdirilmişdir. Amma ilk oxunuşdan sonra bu limitlər sənəddən çıxarılıb.
"Biz Qazaxstanın kapitalın beş min manatdan başlayaraq 35 min, 53 min, 71.2 min və 130 min manatadək artırılmasını nəzərdə tutan təcrübəsilə tanış olmuşuq. Amma biz artım məsələsini bazarda olan vəziyyətə uyğun olaraq nəzərdən keçiririk və QBKT-na yüksək nizamnamə kapitalı tələbi qoyulmayacaq", - Quliyev deyib.
Onun sözlərinə görə, QBKT-in nizamnamə kapitalı ilə bağlı tələbi 100-150 min manat məbləğində və ya daha az ola bilər və dəqiq variant digər ölkələrin təcrübəsi öyrənildikdən sonra müəyyən olunacaq.
Hazırda kredit təşkilatları üçün nizamnamə kapitalı dörd min manat həcmində müəyyən olunub. "Qeyri-bank təşkilatları haqqında" qanun parlamentdə ikinci oxunuşdadır.
Bu gün ölkədə cəmi 18 qeyri-bank təşkilatı fəaliyyət göstərir. Onlardan 14-ü beynəlxalq humanitar təşkilatlar tərəfindən yaradılıb.
Azərbaycanda 31 mikromaliyyə təşkilatı fəaliyyət göstərir. O cümlədən AgrarCredit dövlət qeyri-bank kredit təşkilatı və mikromaliyyələşdirmə ilə məşğul olan banklar. Bu gün mikromaliyyə təşkilatlarının 256 min fəal müştərisi var və onların kredit portfeli 150 milyon manat təşkil edir.
Məqalə müəllifi ilə əlaqə ünvanı: [email protected]
