Azərbaycan, Bakı, 21 oktyabr / Trend , müxbirlər E.İsmayılov, N.Kirsxaliya/
"Azərbaycan Dəmir Yolları" QSC-dəki mənbədən daxil olan məlumatda deyilir ki, Gürcüstan ərazisindəki dəmiryolda baş verən partlayışla əlaqədar olaraq Azərbaycandan Gürcüstana gedən dəmiryol qatarlarının hərəkətində məhdudlaşma müşahidə edilmir. Partlayış Tbilisi-Poti dəmiryol magistralında baş verib.
"Azərbaycandan Poti istiqamətində yük hərəkəti azdır, qatarların hərəkətində məhdudlaşma yoxdur", - mənbə deyib.
Mənbənin sözlərinə görə, Azərbaycan yüklərinin 70-80 faizə yaxını Batumi limanı istiqamətində gedir. Poti istiqamətində bu rəqəmlər elə də böyük deyil və hazırda bu qatarlar bu istiqamətdə məhdudiyyət olmadan hərəkət edir.
"Yolun partlayış baş verən hissəsində hərəkətin günün sonunadək bərpa edilməsi planlaşdırılır", - mənbə deyib.
"Gürcüstan Dəmir Yolları" ASC-dən Trend -ın xüsusi müxbirinə verilən məlumata görə, Gürcüstanın Poti limanına hərəkət bu gün axşam bərpa ediləcək.
"Dəyən zərər çox cüzidir, az miqdarda mazut dağlılb, ətraf mühitin çirklənməsi təhlükəsi yoxdur. Əsasən dəmiryol xətləri və elektrik xətlərinə ziyan dəyib", - ASC-dən deyilib.
Gürcüstanın Ətraf Mühitin Qorunması və Təbii Ehtiyatlar Nazirliyinin əməkdaşları hadisə yerindədirlər.
Ötən gecə baş verən partalyış nəticəsində mazutla yüklənmiş 12 vaqon relsdən çıxıb. Partalyış dalğası o qədər güclü olub ki, ətrafdakı evlərin şüşələri sınıb, vaqonlardan mazut axaraq tökülüb. İlkin məlumatlara görə, partlayıcı maddə olan trotildən istifadə edilib. Bu barədə Gürcüstanın "Rustavi-2" telekanalı məlumat verib.
Məqalə müəllifi ilə əlaqə ünvanı: [email protected]
