Azərbaycan, Bakı, 22 oktyabr / Trend , müxbir N.İsmayılova/
Dünya Bankının (DB) Cənubi Qafqazda maliyyə məsələləri üzrə kordinatoru və bankın maliyyə proqramının rəhbəri Maykl Edvardsonun baçşılıq etdiyi missiyanın cümə axşamı Bakıya səfəri başlayıb.
Səfərin əsas məqsədi ölkənin maliyyə sektorunda bank tərəfindən həyata keçirilən layihələrin gedişatı ilə tanış olmaqdır. Bu layihələr arasında bankın 4,5 milyon dollar ayırdığı maliyyə sektoruna texniki dəstək layihəsi və maliyyə xidmətlərinin inkişafı layihəsi (12,25 milyon dollar) yer alır.
Mərkəzi Bank yanında ilk layihə çərçivəsində 2005-ci ilin mart ayından fəaliyyət göstərən mərkəzləşdirilmiş kredit reyestri yaradılıb. Kredit reyestri bankların kredit risklərinin idarə edilməsindəki vasitələrdən biridir. DB-nin Azərbaycanın maliyyə sektoruna texniki dəstək layihəsinə ayırdığı kreditdən 1,8 milyon dollar Mərkəzi Bank tərəfindən Milli Prossesinq Mərkəzinin yaradılmasına yönəldilib. Bu il kreditin bu hissəsinin prosessinq şirkəti tərəfindən ödənilməsi artıq başa çatıb.
Maliyyə xidmətlərinin inkişafı layihəsi çərçivəsində Azərpoçtun fəaliyyətinin maliyyə xidmətlərinin göstərilməsi sahəsində yaranan risklərin idarəedilməsi şərtlərinə uyğunlaşdırılması nəzərdə tutulur. 2009-cu il dekabrın 1-dək milli poçt operatorunun lisensiyalaşdırılması gözlənilir.Gələn ildən Azərpoçt qeyri-bank kredit təşkilatı qismində maliyyə xidmətləri göstərməyə başlayacaq.
Layihənin ümumi məbləği 17,5 milyon dollar təşkil edir. Bu məbləğdən 12,25 milyon dollar DB-nin kreditinin payına, qalan hissəsi isə Azərbaycan hökumətinin payına düşür. İsveçrə hökuməti də layihənin reallaşmasına 612 min dollarlıq texniki dəstək göstərib.
İlk layihənin həyata keçirilməsi artıq başa çatıb, İkinci layihənin isə 2009-cui ilin sonlarında başa çatacağı gözlənilir.
Məqalə müəllifi ilə əlaqə ünvanı: [email protected]
