...

Azersun Holding ilin sonuna duz istehsalı üzrə zavodu istismara vermək niyyətindədir

Biznes və iqtisadiyyat xəbərləri Materials 6 Noyabr 2009 15:04 (UTC +04:00)

Azərbaycan, Bakı, 6 noyabr / Trend , müxbir, Ü.İsmayılova, E.İsmayılov/

Azersun Holding 2009-cu ilin sonuna Bakının Masazır qəsəbəsində yodlaşdırılmış və saflaşdırılmış xörək duzu istehsalı üzrə zavodu istismara verməyi planlaşdırır, bu haqda holdinqin prezidenti Əbdülbari Gözəl məlumat verib.

"Zavodda yeni texnologiya tətbiq edilməklə duz istehsal ediləcək", - deyə Gözəl bildirib.

Zavodun inşası üçün yeddi hektarlıq ərazi Azərsun Holding-in təsis etdiyi "Azərbaycan duzu" İstehsalat Birliyi" QSC-yə və Azərbaycan İnvestisiya Şirkətinə (AİŞ) verilib. AİŞ layihəyə 2,9 milyon dollar vəsait qoymaq niyyətindədir və şirkət "Azərbaycan duzu" İB-nin nizamnamə kapitalında 25 faizlik iştirak əldə edəcək. Layihənin ümumi dəyəri 12 milyon dollardır.

İsveçrənin Evoterm şirkəti zavodun tikintisi üçün lazımi avadanlığı təqdim edib. İnşaat işləri Türkiyənin İnova şirkəti tərəfindən aparılır.

Zavod Masazır gölünün yaxınlığında tikilir. Bu ərazidə göldən duzun yığılması üçün zavod və infrastruktur yerləşib. İlk növbədə duz Masazır gölündə yerləşən sahələrdən yığılacaq. Gələcəkdə Türkmənistandan tədarük nəzərdə tutulur.

"Türkmənistandan tədarük zavodun tikintisindən ən azı ilyarım sonra başlaya bilər, hələlik zavod yerli duz əsasında işləyəcək", - daha əvvəllər Azərbaycan İnvestiisya Şirkətindən deyilib.

Yodlaşdırılmış duza tələbatın çox olması ilə əlaqədar olaraq zavodun istehsal xətti 2 dəfə artaraq sutkada 200 tona çatıb. Əvvəllər 30 min tonluq illik istehsalla gündə 100 ton yodlaşdırılmış xörək duzu istehsal etmək planlaşdırılmışdı.

Müəssisədə yüksək keyfiyyətli xörək duzunun istehsalı ilə yanaşı tibbi duzun da istehsalını təşkil etmək planlaşdırılır.

Yod çatışmazlığı probleminin aktuallığını UNİCEF-in donor yardımı ilə həyata keçirilən "Yod çatışmazlığı problemi və universal duzun yodlaşdırılması" layihəsinin nəticələri də göstərib.

Azersun Holding 1992-ci ildə yaradılıb. Holdinqin fəaliyyət sahələrini çayların, bitki yağlarının emalı və çəkilib-bükülməsi, ticarət və distrubutopluq, inşaat, bank fəliyyəti, ət və tərəvəz konservləri, şəkər və kağız-karton məmulatlarının istehsalı, yüklərin daşınması və saxlanması və s. təşkil edir. Gözəlin verdiyi məlumata görə, holdinq Kürdəmir rayonunda süd istehsalı üzrə zavodun tikintisini də planlaşdırır. Ölkədə heyvandarlığın inkişafı da yaxın planlara daxildir.

"Azersun Holding bütün yeni istehsal xətlərində yeni texnologiyalar tətbiq etmək niyyətindədir", - deyə Gözəl bildirib.

Məqalə müəllifi ilə əlaqə ünvanı: [email protected]

Xəbər lenti

Xəbər lenti