Azərbaycan, Bakı, 25 noyabr / Trend , müxbir S.Ağayev/
Noyabrın 26-da Dehlidə Azərbaycan və Hindistan hökumət nümayəndələri arasında keçiriləcək danışıqların əsas mövzusu informasiya texnologiyaları, turizm, təhsil, səhiyyə, elm və mədəniyyət sahəsində əməkdaşlıqdır.
Danışıqlar iki ölkə arasında ticari-iqtisadi və elmi-texniki əməkdaşlığa dair hökümətlərarası komissiyanın birinci iclası çərçivəsində keçiriləcək. Bu barədə çərşənbə günü, Azərbaycanın Hindistandakı səfiri Tamerlan Qarayev Trend -a deyib.
Ekologiya və təbii sərvətlər naziri Hüseynqulu Bağırovun rəhbərlik etdiyi Azərbaycanın müxtəlif nazirlik və idarə nümayəndələrinin daxil olduğu Azərbaycan nümayəndə heyəti artıq Dehlidədir.
İclasın yekununa dair protokol imzalamaq planlaşdırılır.
"Danışıqlar zamanı həmçinin hər iki ölkə arasında müqavilə-hüquq bazasının genişləndirilməsi məsələsi nəzərdən keçiriləcək", - səfir bildirib.
