Azərbaycan, Bakı, 26 noyabr / Trend , müxbir N.İsmayılova/
2009-cu ilin yanvar-oktyabr aylarında Azərbaycanda qiymətli kağızların dövriyyəsi 359,4 milyon manat təşkil edib ki, bu da ötən ilin analoji dövr göstəricisindən 10% çoxdur. Bu barədə Qiymətli Kağızlar üzrə Dövlət Komitəsindən məlumat verilib.
Bu dövr ərzində bağlanan sazişlərin sayı 3231 təşkil edib. Keçən il bu göstərici 5504 olub.
Hesabat dövrü ərzində səhmlərin dövriyyəsi 270,1 mln. manat təşkil edib ki, bu da ötən ildəki göstəricidən 4% aşağıdır. Bununla yanaşı, səhmlərin ilikin bazarının həcmi dəyişməz olaraq qalsa da Bakı Fond Birjasında yerləşdirilmiş səhmlərin təkrar bazarının həcmi artaraq 13,9 dəfə təşkil edib. Birja xarici əməliyyatlarının həcmi isə 32% azalıb.
Korporativ istiqrazların dövriyyəsi 90% artaraq 89,4 milyon manat təşkil edib. Dövlət qiymətli kağızlar bazarının dövriyyəsi cari ilin yanvar-oktyabr aylarında 2,78 milyard manat təşkil edib ki, bu da ötən ilin analoji dövründəki həcmdən 61% azdır.
Dövlət istiqrazlar bazarının həcmi 74% artaraq 567,7 mln. manat təşkil edib. Ölkənin Mərkəzi Bankının not bazarı isə 81% azalaraq 338,2 mln. manat olub.
Repo və əks repo əməliyyatları 1,85 milyard manat təşkil edib.
Noyabrın 26-na olan rəsmi məzənnə: 0,8026 AZN/USD
Məqalə müəllifi ilə əlaqə ünvanı: [email protected]
