Azərbaycan, Bakı, 02 dekabr / Trend /
Azərbaycanın Nəqliyyat Nazirliyi Brüsseldə NATO Avroatlantika Əməkdaşlığı Şurası formatında Daxili Yerüstü Nəqliyyat üzrə Planlaşdırma Komitəsinin plenar iclasında iştirak edib. Bu barədə nazirliyin çərşənbə günü yayılan məlumatında deyilir.
Plenar iclasda Azərbaycanı Nəqliyyat Nazirliyinin Təhlükəsizlik və fövqəladə hallar şöbəsinin müdiri Kazım Şərifov təmsil edib və Azərbaycanın nəqliyyat sektorunda həyata keçirilən işlərin və layihələrin, həmçinin beynəlxalq dəhlizlərin və onların əhəmiyyətinin təqdimatı barədə çıxış edib. Azərbaycan təmsilçilərinin təqdimatı təşkilatçılar və iştirakçılar tərəfindən Azərbaycanın dünyaya həm də təhlükəsizlik töhfəsi kimi qəbul edilib.
Şuranın əsas vəzifələrindən biri üzvlərin və tərəfdaşların nəqliyyat infrastrukturunun öyrənilməsi, təkliflərin və hesabatların hazırlanmasıdır.
