Bakı, 05 fevral / Trend , müxbir N.İsmayılova/
İlin birinci yarısının sonuna kimi Azərbaycanda biznesin online qeydiyyat sistemi tətbiq olunacaq. Bu barədə Vergilər Nazirliyi yanında Xüsusi rejimli vergi xidməti Departamentinin rəhbəri Zaur Fətizadə cümə günü deyib.
"Ölkənin Vergilər Nazirliyi bu sistemi hələ ötən ildən hazırlamağa və indi tətbiq etməyə başlayıb. Bu sistemin tam faəliyyətə başlaması üçün maksimum müddət cari ilin iyul ayının 1-idir", - Fətizadə deyib.
Onun sözlərinə görə, online qeydiyyat sistemi dünyanın cəmi 15-20 ölkəsində tətbiq edilib. İlkin olaraq bu sistemdə fərdi sahibkarlar (fiziki şəxslər) qeydiyyata alınacaq, sonra isə bu, hüquqi şəxslərə də tətbiq ediləcək.
Ölkədə biznesin online qeydiyyat sisteminin tətbiq edilməsi sahibkarların vaxtına və xərclərinə qənaət etməyə, daxil olan məlumatın keyfiyyətinin artmasına, hüquqi dəqiqliyinə nəzarətin yaxşılaşdırılmasına imkan verəcək.
