Azərbaycan, Bakı, 18 mart / Trend , müxbir N.İsmayılova/
"Azərnəqliyyatbank"ın adı dəyişərək "Express Bank" olub. Bu barədə bankın idarə heyətinin sədri Emin Məmmədov məlumat verib.
"Azərbaycanın Mərkəzi Bankı martın 17-də "Azərnəqliyyatbank"ın adının "Express Bank" ilə əvəz edilməsi ilə əlaqədar olaraq zərurət yarandığı üçün bankın bank fəaliyyəti göstərməsi üzrə lisenziyasını yeniləyib", - Məmmədov deyib.
Onun sözlərinə görə, bu ad sürətli və keyfiyyətli xidmət anlamına gəlir və bank müştərilərinə bu cür xidmət təqdim etmək niyyətindədir. O, həmçinin ölkənin pərakəndə xidmət bazarında aparıcı banklarla rəqabət yaratmaq niyyətindədir.
"Son il yarım ərzində bankın təsisçiləri dəyişib və bankın fəaliyyətində dəyişikliklər başlayıb, yeni strategiya qəbul edilib və buna əsasən bank inkişaf edəcək və bankın fəaliyyəti korporativ biznesin bank xidmətlərinə və pərakəndə xidmətlərin 50-50 səviyyəsinədək çatmasına yönələcək", - o deyib.
Azərnəqliyyatbank 1989-cu ildə Azərbaycan Avtomobil Nəqliyyatı Nazirliyinin müxtəlif təşkilatları tərəfindən kommersiya bankı kimi təsis edilib.
