Azərbaycan, Bakı, 10 aprel /Trend, müxbir N.İsmayılova/
"RoyalBank" ASC 2010-cu ilin əvvəlindən Azərbaycan Kənd Təsərrüfatı Nazirliyinin Kənd Təsərrüfatı Kreditləri üzrə Dövlət Agentliyinin xətti ilə 2,42 milyon manat məbləğində kredit verib. Bu barədə şənbə günü bankdan bildirilib.
"Həmin kreditlər Gəncə, Qazax, Tovuz, Lerik və Biləsuvarda rayonlarında kənd təsərrüfatının inkişafına yönəldilib", - bankdan deyilib.
Kənd Təsərrüfatı Kreditləri üzrə Dövlət Agentliyinin vəsaitləri hesabına kənd təsərrüfatının inkişafı ilə bağlı layihələrin və proqramların maliyyələşdirilməsi aktiv şəkildə davam etdirilir.
RoyalBank 1993-cü ildə OZ Bank kommersiya bankı kimi təsis edilib. Daha sonralar bankın adı RoyalBank ilə əvəz edilib. 2006-cı ildə RoyalBank-ın səhmləri Bakı Fond Birjasına yerləşdirilib və bankın hüquqi statusu açıq tipli səhmdarla əvəz edilib.
2010-cu ildə dövlət büdcəsindən Kənd Təsərrüfatı Nazirliyinin Kənd Təsərrüfatı Kreditləri üzrə Dövlət Agentliyi üçün 10 milyon manat ayırmaq planlaşdırılır. Dövlət Agentliyi Azərbaycan Prezidentinin 23 oktyabr 2004-cü il "Aqrar strukturda idarəetmənin təkmilləşdirilməsinə dair tədbirlər haqqında" fərmanına əsasən yaradılıb.
Azərbaycan Respublikasının Kənd Təsərrüfatı Nazirliyi yanında Kənd Təsərrüfatı Kreditləri üzrə Dövlət Agentliyinin vəsaitləri hesabına kənd təsərrüfatının inkişafı ilə bağlı layihələrin və proqramların maliyyələşdirilməsi aktiv şəkildə davam etdirilməkdədir.
Kənd Təsərrüfatı Kreditləri üzrə Dövlət Agentliyinin müvəkkil kredit təşkilatı olaraq "RoyalBank" ASC tərəfindən cəmi 2 521 660 AZN məbləğində kredit verilib ki, bu da Gəncə, Qazax, Tovuz, Lerik və Biləsuvarda kənd təsərrüfatının inkişafına müsbət təsir göstərib.