Azərbaycan, Bakı, 13 aprel /Trend, müxbir N.İsmayılova/
Azərbaycan Mərkəzi Bankı (AMB) sərəncamında olan xarici ehtiyatların və menecerlərin idarəçiliyinə verılən portfelin xarici idarəçiliyinin genişləndirilməsi imkanlarını nəzərdən keçirir. Bunu çərşənbə axşamı AMB İdarə Heyətinin sədri Elman Rüstəmov deyib.
"Biz Mərkəzi Bankın ehtiyatlarını idarə edən bankların sayının artırılması imkanlarını nəzərdən keçiririk və vəsaitlərin müəyyən dərəcədə həcmi onların sərəncamındadır, zənnimcə, bu istiqamətdə irəliyə doğru hərəkət edəcəyik", - Rüstəmov deyib.
Onun sözlərinə görə, AMB-nin vəsaitlərin idarəçiliyə verilməsi ilə bağlı limiti yoxdur, proses iqtisadi məqsədəuyğunluqdan asılı olacaq.
"Biz valyuta siyasətini daim təkmilləşdiririk və bu təkmilləşmələr texniki xarakter daşıyır; biz avtomatlaşdırmanı artırırıq, məsləhətləşmələr və ehtiyatların idarə olunması proqramı (RAMP) çərçivəsində Dünya Bankı ilə əməkdaşlıq edirik", - Rüstəmov deyib.
Hazırda üç menecerin - Dünya Bankının xəzinədarlığı, İsveçrənin UBS bankı və Amerikanın JP Morgan - idarəçiliyində 270 milyon dollar var. DB-nin sərəncamında 110 milyon dollar, UBS - 105 milyon dollar, JP Morgan - 55 milyon dollar var.
AMB-nin sərəncamında olan valyuta ehtiyatları 2010-cu ilin birinci rübünün yekunları üzrə 5,510 milyard dollar təşkil edib. İlin əvvəli ilə müqayisədə bu göstərici 6,7 faiz və ya 348,3 milyon dollar artıb. 2009-cu ildə ölkənin strateji valyuta ehtiyatları üç milyard dollar artaraq 20 milyard dolları keçib. 2010-cu ilin birinci rübünün yekunları üzrə bu göstərici 22 milyard dollara çatıb.
Təhlükəsizliyin təminatı üçün AMB-nin valyuta ehtiyatları ABŞ Federal Ehtiyat Sisteminin (ehtiyatların dollar hissəsi), Böyük Britaniya Mərkəzi Bankının (funt/sterlinq) hesablarında saxlanılır. Avropa valyutasında ehtiyatlar həmçinin ən sabit kontragentlərdə saxlanılır.