Azərbaycan, Bakı, 15 aprel /Trend, müxbir N.İsmayılova/
Stavropol diyarı nümayəndə heyəti aprelin 27-29-da Azərbaycanda səfərdə olacaq. Bunu cümə axşamı iqtisadi inkişaf nazirinin müavini Niyazi Səfərov deyib.
"Azərbaycan İqtisadi İnkişaf Nazirliyi bu səfərə ciddi hazırlaşır. Səfər çərçivəsində biznes-forumun keçirilməsi planlaşdırılır, sahibkarlar arasında ikitərəfli görüşlər təşkil olunacaq", - nazir müavini bildirib.
Rusiyanın Azərbaycandakı səfiri Vladimir Doroxin deyib ki, hazırda Azərbaycanın əməkdaşlıq etdiyi Rusiya regionları, əsasən, ölkənin ucqar ərazilərində yerləşir. "Lakin RF-in həmsərhəd regionları ilə qarşılıqlı münasibətləri inkişaf etdirmək lazımdır", - o hesab edir.
2009-cu ildə iki ölkə arasında əmtəə dövriyyəsinin həcmi 1,816 milyard dollar səviyyəsində olub. Azərbaycanın statistik məlumatlarına görə, ötən il əmtəə dövriyyəsi altı faiz, Rusiya tərəfinin məlumatına görə, 25 faiz azalıb.
Ötən il Azərbaycana maşın-texniki məhsulların idxalı üzrə 80 faiz azalma müşahidə olunub. Bu, Rusiyanın ixrac strukturunda 40 faizə yaxın təşkil edirdi. Azərbaycan və Rusiya arasında əmtəə dövriyyəsi 1541 adda malı əhatə edir ki, bu da kifayət qədər yaxşı göstəricidir.
Azərbaycandan Rusiyaya, əsasən, meyvə-tərəvəz məhsulları idxal olunur ki, Azərbaycan ixracının yarısı bunun payına düşür. İdxalın ümumi kənd təsərrüfatı məhsullarının payı 53,5 faiz, ixrac 22,6 faiz təşkil edir.
2009-cu ildə tikinti-quraşdırma işlərinin və Rusiyadan Azərbaycana tikinti materiallarının gətirilməsinə tələbatın azalması əmtəə döviyyəsinin düşməsinə təsir göstərib.
2010-cu ildə strateji məqsəd qarşılıqlı əmtəə dövriyyəsinin iki milyard dollar səviyyəsinə çatdırılmasıdır. Rusiyanın Azərbaycandakı ticarət nümayəndəliyinin təmsilçisinin fikrincə, bu məqsədə çatmaq mümkündür; belə ki, hazırda Azərbaycan qazının ixracı genişlənir. "Başqa ehtiyatlar da var, biz onların, eyni zamanda, dəmir yolu nəqliyyatının modernləşdirilməsi üzrə proqramın reallaşmasını gözləyirik ki, bu da müxtəlif texnika və rabitə vasitələrinin daşınmasını əhatə edir", - ticarət nümayəndəliyində belə hesab edirlər.
2008-ci ildə iki ölkə arasında əmtəə dövriyyəsinin həcmi 2,4 milyard dollar təşkil edib.
Hazırda Azərbaycanda Rusiya kapitallı 500-dən çox şirkət fəaliyyət göstərir. Onların yarısı 100 faiz Rusiya şirkətidir.