Azərbaycan, Bakı, 26 aprel /Trend, müxbir Ü.İsmayılova/
2010-cu ildə Azərbaycanda taxıl istehsalı həcmində 200-300 ton azalma gözlənilir. Bu barədə Azərbaycan Kənd Təsərrüfatı Nazirliyinin bitki məhsullarının emalı və istehsalına nəzarət şöbəsinin müdiri Sabir Vəliyev bazar ertəsi bildirib.
"2010-cu ildə Azərbaycanda 2,7-2,8 milyon ton taxıl yığılacaq. Bu göstərici ötən il 3 milyon ton təşkil edib", - Vəliyev deyib.
Onun sözlərinə görə, bu göstərici il ərzində ərzaq taxılına Azərbaycanın daxili tələbatını təmin etmək üçün kifayətdir. Ölkənin Kənd Təsərrüfatı Nazirliyi həmçinin bu həcmin artırılmasında maraqlı deyil, belə ki, 2008-2015-ci illərdə Azərbaycanda əhalinin ərzaq məhsulları ilə etibarlı təmin edilməsinə dair dövlət proqramına əsasən, ölkədə taxıl istehsalı həcmi ildə 2,8 milyon ton səviyyəsində təmin edilməlidir, artıq ötən il rekord qırılıb.
Nazirliyin şöbə müdiri həmçinin bildirib ki, 2010-cu ildə 2009-cu illə müqayisədə 147 min hektardan az torpaq əkilib ki, bu da kiloqramı 0,10-0,12 manat qiymətlə satılan birinci sort yerli taxılın satışı ilə yaranan problemlərlə əlaqədardır.
Vəliyev bildirib ki, yerli çörək istehsalçıları xammal qismində kiloqramı 0,5-0,6 manat dəyərində idxal edilən taxıl almağa üstünlük verirlər, baxmayaraq ki, bu taxıl 4-5-ci növ taxıl sortuna aiddir.
"Keçirilən monitorinqlər nəticəsində çörəyin qiymətinin azalması haqqında qərarın qəbulu mümkündür, belə ki, idxal edilən taxılın qiymətinin aşağı olması səbəbindən onun qiyməti maya dəyərini ötür", - o deyib.
Vəliyev ölkəyə taxıl idxalına qadağa qoyulmasını müvafiq hesab edir, belə ki, bu gün Azərbaycan yerli istehsal hesabına ərzaq taxılına daxili tələbatını ödəyə bilər.
Nazirlər Kabinetinin 2009-cu il üzrə hesabatına əsasən, ötən il 1700 min hektar torpaqda əkin işləri aparılıb, onlardan 1125 min hektarına paxla və taxıl, o cümlədən qarğıdalı, 111,7 min hektara tərəvəz və çöl məhsulları, 40,8 min hektara texniki bitkilər, 360,4 min hektara isə yem bitkiləri əkilib.
Ötən il hər hektar torpaqdan 26,6 sentner və ya 3 milyon ton taxıl istehsal olunub.
Azərbaycana taxıl idxal edən əsas ölkələr Rusiya, Qazaxıstan və Ukraynadır.